ମାଲକାନଗିରି(ଓଡ଼ିଶା ରିପୋର୍ଟର): ନାଗ ସାପ ସହିତ ଗେଲ ହେଲେ, ସେଲ୍ଫି ବି ନେଲେ। ସେଲ୍ଫି ନେବା ବେଳେ ଚୋଟ ମାରିଲା ନାଗ। ଚୋଟ ଖାଇ ଯୁବକଙ୍କ ମୃତ୍ୟୁ ହୋଇଛି। ଆଜି ଏହି ମର୍ମନ୍ତୁଦ ଅଘଟଣ ଘଟିଛି ମାଲକାନଗିରି ଥାନା ଗଙ୍ଗଲା ଗାଁରେ। ମୃତକ ଜଣକ ଏହି ଗାଁର ଅଜୟ ପାଟଲା।
ସୂଚନା ମୁତାବକ, ଏହି ଗାଁର ଜଣେ ବ୍ୟକ୍ତିଙ୍କ ଘରେ ଏକ ବିଷଧର ସାପ ପଶି ଯାଇଥିଲା। ଖବର ପାଇ ସହାୟତା କରିବାକୁ ଅଜୟ ପହଞ୍ଚି ଯାଇଥିଲେ। ସେ ଏହି ଘରୁ ନାଗ ସାପକୁ ଉଦ୍ଧାର କରିଥିଲେ। ହେଲେ କିଛି ସମୟ ସାପକୁ ଖେଳାଇବା ପରେ ସେଲ୍ଫି ନେଉଥିବା ବେଳେ ଅଜୟଙ୍କୁ ଚୋଟ ମାରିଥିଲା ନାଗ।
ସ୍ଥାନୀୟ ଲୋକେ ତାଙ୍କୁ ତୁରନ୍ତ ମେଡିକାଲ ନ ନେଇ ଗୁଣିଆ ନିକଟରେ ଝଡ଼ାଫୁଙ୍କା କରାଇଥିଲେ। ଫଳରେ କିଛି ସମୟ ପରେ ଅଜୟଙ୍କ ମୃତ୍ୟୁ ହୋଇଯାଇଥିଲା। ଏହି ଘଟଣା ସ୍ଥାନୀୟ ଗ୍ରାମରେ ଶୋକର ଛାୟା ଖେଳାଇ ଦେଇଛି।