ଭୁବନେଶ୍ୱର(ଓଡ଼ିଶା ରିପୋର୍ଟର): ସାଧାରଣ ନିର୍ବାଚନ ପୂର୍ବରୁ ଅନୁଷ୍ଠିତ ଶେଷ ମନ୍ତ୍ରିପରିଷଦ ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜ ସରକାରର ୫ବର୍ଷର ରିପୋର୍ଟ କାର୍ଡ ଉପସ୍ଥାପନ କରିଛନ୍ତି। ନିର୍ବାଚନକୁ ଦୃଷ୍ଟିରେ ରଖି ପ୍ରଚାର ଉଦ୍ଦେଶ୍ୟରେ ଦେଶରେ ଇତିହାସରେ ପ୍ରଥମଥର ପାଇଁ ରାଜ୍ୟ ମନ୍ତ୍ରିପରିଷଦ ବୈଠକର ସିଧାପ୍ରସାରଣ କରାଇଥିବା ନବୀନ ପଟ୍ଟନାୟକ ସରକାର ଗତ ୫ବର୍ଷ ପୂର୍ବରୁ ରାଜ୍ୟବାସୀଙ୍କୁ ଦେଇଥିବା ସମସ୍ତ ପ୍ରତିଶ୍ରୁତି ପୂରଣ କରିଥିବା ଦାବି କରିଛନ୍ତି। ୫ବର୍ଷ ମଧ୍ୟରେ ୨୦ଲକ୍ଷ ପରିବାରକୁ ଘର ଓ ୧୨ଲକ୍ଷ ଲୋକଙ୍କୁ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ଦିଆଯାଇଛି ବୋଲି ଦମ୍ଭୋକ୍ତି ବାଢ଼ିଛନ୍ତି। ଏହା ସହିତ ଭବିଷ୍ୟତରେ ମଧ୍ୟ ପ୍ରତିଶ୍ରୁତିକୁ ପୂରଣ କରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଆଜି ଅପରାହ୍ନରେ ରାଜ୍ୟ ସଚିବାଳୟରେ ଅନୁଷ୍ଠିତ ମନ୍ତ୍ରିପରିଷଦ ବୈଠକରେ ଅଧ୍ୟକ୍ଷତା କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ ଯେ, ସାଢ଼େ ୪କୋଟି ଓଡ଼ିଶାବାସୀ ହେଉଛନ୍ତି ତାଙ୍କ ପରିବାର ଓ ବିଜେଡି ଦେଇଥିବା ଇସ୍ତାହାରକୁ ତାଙ୍କ ସରକାର ୨୦୧୪ ମେ’ ୨୧ତାରିଖରେ ଶପଥ ଗ୍ରହଣ କରିବା ଦିନ ନୀତି ଭାବେ ଗ୍ରହଣ କରି ସମସ୍ତ ପ୍ରତିଶ୍ରୁତିକୁ ପୂରଣ କରିଛନ୍ତି। ଲୋକଙ୍କୁ ୨୦୧୪ ମସିହା ନିର୍ବାଚନରେ ଦେଇଥିବା ପ୍ରତିଶ୍ରୁତିକୁ କେତେ ପାଳନ କରାଯାଇଛି ,ତା’ର ସମୀକ୍ଷା ସେ ପ୍ରତିବର୍ଷ ମେ’ ୨୧ତାରିଖରେ ମନ୍ତ୍ରିପରିଷଦ ବୈଠକ ଡାକି କରିଥାନ୍ତି। ୨୦୧୪ରେ ରାଜ୍ୟର ସବୁ କଚ୍ଚା ଘରକୁ ପକ୍କାଘର କରିବା ପାଇଁ ପ୍ରତିଶ୍ରୁତି ଦିଆଯାଇଥିଲା। ଏବେ ରାଜ୍ୟ ସରକାର ରେକର୍ଡ ସଂଖ୍ୟକ ୨୦ଲକ୍ଷ ଘର ନିର୍ମାଣ କରିସାରିଛନ୍ତି। ସେହିପରି ଏବେସୁଦ୍ଧା ପରୋକ୍ଷ ଓ ପ୍ରତ୍ୟକ୍ଷ ଭାବେ ୧୨ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରାଯାଇଛି। ଏଥିରୁ କେବଳ ସରକାରୀସ୍ତରରେ ୧ଲକ୍ଷ ୧୨ହଜାର ନିଯୁକ୍ତି ଦିଆଯାଇଛି।
୫ବର୍ଷ ମଧ୍ୟରେ ଦୁଇଥର ମେକ୍ ଇନ୍ ଓଡ଼ିଶା କାର୍ଯ୍ୟକ୍ରମର ସଫଳ ଆୟୋଜନ କରାଯାଇ ୩୦ଲକ୍ଷ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି କରାଯାଇଛି । ଏହାବ୍ୟତୀତ ୨୦୧୯ ମେ’ ସୁଦ୍ଧା ଅତିରିକ୍ତ ୧୦ଲକ୍ଷ ହେକ୍ଟର ଜମିକୁ ଜଳସେଚନ ସୁବିଧା ଯୋଗାଇବା ଲକ୍ଷ୍ୟ ହାସଲ ହେବ। ଶ୍ରମିକଙ୍କ କଲ୍ୟାଣ କ୍ଷେତ୍ରରେ ଓଡ଼ିଶା ଏକ ମଡେଲ ରାଜ୍ୟରେ ପରିଣତ ହୋଇଛି। ବିଜୁ ଏକ୍ସପ୍ରେସ୍ ୱେର ୭୦ ପ୍ରତିଶତ କାର୍ଯ୍ୟ ଶେଷ ହୋଇଛି। ସେହିପରି ୨୦୧୫ରୁ ଚାଷୀଙ୍କୁ ୧ପ୍ରତିଶତ ସୁଧରେ ଫସଲ ଋଣ ଦିଆଯାଉଥିଲା, ଏବେ କାଳିଆ ଯୋଜନାରେ ବିନା ସୁଧରେ ଋଣ ଦିଆଯାଉଛି। ଏହାବ୍ୟତୀତ ଆଜି କାଳିଆ ଯୋଜନାରେ ଆଉ ୪.୮୦ଲକ୍ଷ ହିତାଧିକାରୀଙ୍କୁ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ୫ହଜାର ଟଙ୍କା ଲେଖାଏ ସହାୟତା ପ୍ରଦାନ କରାଯାଇଛି।