ଭବାନୀପାଟଣା (ରାଜକୁମାର ସିଂହଦେଓ): ଟଙ୍କା ନେଣଦେଣକୁ ନେଇ ଜଣେ ବ୍ୟକ୍ତିଙ୍କୁ ଠେଙ୍ଗାରେ ପିଟି ପିଟି ମାରିଦେଲା ତାଙ୍କ ପଡ଼ୋଶୀ। ଏଭଳି ଅଭିଯୋଗ ଆସିଛି କଳାହାଣ୍ଡି ଜିଲ୍ଲା କେସିଙ୍ଗା ଥାନା ଅନ୍ତର୍ଗତ କେରେଗୁଡ଼ା ଗାଁରୁ। ମୃତକଙ୍କ ନାଁ ସୁଖଦେବ ସା (୪୮)। ତାଙ୍କ ଘର କେରେଗୁଡ଼ା ଗାଁରେ। ଅଭିଯୁକ୍ତର ନାଁ ବିଭୂତି ଦୁରିଆ। ତା’ ଘର ବି ସେହି ଗାଁରେ।
ଅଭିଯୋଗ ଅନୁଯାୟୀ, ଆଜି ଦିନ ପ୍ରାୟ ୧୧ଟା ବେଳେ ଟଙ୍କା ନେଣଦେଣକୁ ନେଇ ସୁଖଦେବ ଓ ତାଙ୍କ ପଡ଼ୋଶୀ ବିଭୂତିଙ୍କ ମଧ୍ୟରେ ପ୍ରଥମେ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ସୁଖଦେବଙ୍କୁ ଠେଙ୍ଗାରେ ପିଟିପିଟି ଦରମରା କରି ଦେଇଥିଲା ବିଭୂତି। ସୁଖଦେବଙ୍କୁ ଗୁରୁତର ଅବସ୍ଥାରେ ଭବାନୀପାଟଣା ଡାକ୍ତରଖାନାକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଠେଙ୍ଗାମାଡ଼ରେ ସୁଖଦେବଙ୍କ ମୁଣ୍ଡରୁ ପ୍ରବଳ ରକ୍ତ ସ୍ରାବ ହୋଇଥିଲା।
ସୁଖଦେବଙ୍କୁ ବିଭୂତି ହତ୍ୟା କରିଥିବା ନେଇ ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି। ପୁଲିସ୍ ବିଭୂତିକୁ ଗିରଫ କରି ଘଟଣାର ତଦନ୍ତ ଚଳାଇଛି।