ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ କରୋନା ମହାମାରୀ ସଂକ୍ରମଣ ବୃଦ୍ଧି ପାଉଥିବାବେଳେ କଟକ ଓ ଭୁବନେଶ୍ୱର ସହରରେ ଥିବା ଅଫିସଗୁଡ଼ିକ ପରିଚାଳନା ନିମନ୍ତେ ରାଜ୍ୟ ସରକାର ଏପ୍ରିଲ ୧୫ତାରିଖରେ ଜାରି କରିଥିବା ନିର୍ଦ୍ଦେଶନାମାରେ ପରିବର୍ତ୍ତନ କରିଛନ୍ତି। କଟକ ଓ ଭୁବନେଶ୍ୱରରେ ବହୁ ସଂଖ୍ୟାରେ କରୋନା ସଂକ୍ରମିତ ଚିହ୍ନଟ ହେଉଥିବାରୁ ଏହି ଦୁଇ ସହରରେ ଥିବା ସରକାରୀ ଅଫିସଗୁଡ଼ିକରେ ଏଣିକି ୫୦ ପ୍ରତିଶତ କର୍ମଚାରୀ ନୁହେଁ ବରଂ କେତେ କର୍ମଚାରୀରେ ଅଫିସ୍ ଚାଲିପାରିବ ତାହା ନିଷ୍ପତ୍ତି ନେବାର କ୍ଷମତା ସମ୍ପୃକ୍ତ ବିଭାଗକୁ ପ୍ରଦାନ କରାଯାଇଛି।
ଆଜି ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ନିର୍ଦ୍ଦେଶନାମା ଅନୁସାରେ, କଟକ ଓ ଭୁବନେଶ୍ୱରରେ ଥିବା କେତେକ ବିଭାଗ ଓ ବିଭାଗୀୟ ମୁଖ୍ୟ ଅଫିସରେ ବହୁ ସଂଖ୍ୟାରେ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି। ତେଣୁ ସରକାରୀ ଅଫିସଗୁଡ଼ିକରେ କରୋନା ସଂକ୍ରମଣ ଯେଭଳି ନବ୍ୟାପିବ ସେଥିପାଇଁ ତୁରନ୍ତ ପଦକ୍ଷେପ ନେବାର ଆବଶ୍ୟକତା ଦେଖାଦେଇଛି। ପୂର୍ବରୁ ଏପ୍ରିଲ ୧୫ତାରିଖରେ କଟକ ଓ ଭୁବନେଶ୍ୱରରେ ଥିବା ସରକାରୀ ଅଫିସଗୁଡ଼ିକ ନିମନ୍ତେ ଏକ ନିର୍ଦ୍ଦେଶନାମା ଜାରି ହୋଇଥିଲା। ଯେଉଁଥିରେ ଉପସଚିବ ଓ ତଦୁର୍ଦ୍ଧ୍ୱ ପାହ୍ୟାର ସମସ୍ତ ଅଫିସରମାନେ ନିଶ୍ଚିତ ଅଫିସ ଆସିବେ। ଅଫିସର ମୋଟ କର୍ମଚାରୀଙ୍କ ମଧ୍ୟରୁ ୫୦ ପ୍ରତିଶତ କର୍ମଚାରୀରେ ଅଫିସ୍ ଚାଲିବ। ଏହି ନିର୍ଦ୍ଦେଶନାମା ଏପ୍ରିଲ ୧୯ରୁ ଲାଗୁ ହୋଇଥିଲା। କିନ୍ତୁ ବହୁ ସଂଖ୍ୟକ କର୍ମଚାରୀ କୋଭିଡ୍ ସଂକ୍ରମିତ ହେବାପରେ ବିଭାଗଗୁଡ଼ିକୁ ନିଜ ନିଜର ଅଫିସରେ କେତେ ସଂଖ୍ୟକ କର୍ମଚାରୀଙ୍କୁ ନେଇ କାମ ଚାଲିପାରିବ ତାହା ସ୍ଥିର କରିବାର କ୍ଷମତା ନ୍ୟସ୍ତ କରାଯାଇଛି। ଅତି ଜରୁରୀ ସ୍ଥିତିରେ ଅଫିସକୁ ସାନିଟାଇଜ୍ ପାଇଁ ବନ୍ଦ କରାଯାଇ ପାରିବ। କେବଳ ଅତ୍ୟାବଶ୍ୟକ କାମ ଯେପରି ବାଧାପ୍ରାପ୍ତ ନହୁଏ ସେଥିପାଇଁ ହାତଗଣତି କର୍ମଚାରୀଙ୍କୁ ନେଇ କାମ ଚଳାଇବାକୁ କୁହାଯାଇଛି। ଯେଉଁ କର୍ମଚାରୀମାନେ ଅଫିସ୍ ନଆସିବେ ସେମାନେ ଘରୁ ରହି କାମ କରିବେ। ଆବଶ୍ୟକ ପଡ଼ିଲେ ସେମାନଙ୍କୁ ଟେଲିଫୋନ୍ ମାଧ୍ୟମରେ ସ୍ୱଳ୍ପ ନୋଟିସରେ ଅଫିସ୍ ଆସିବେ ବୋଲି ଏହି ନିର୍ଦ୍ଦେଶନାମାରେ କୁହାଯାଇଛି।