ଭୁବନେଶ୍ୱର(ଓଡ଼ିଶା ରିପୋର୍ଟର): ଏଣିକି ୮ଟି ଗୃହ ଥିବା ଅଟ୍ଟାଳିକାକୁ ଆପାର୍ଟମେଣ୍ଟ କୁହାଯିବ । ଉଚ୍ଚ ଅଟାଳିକା ନିର୍ମାଣ ପାଇଁ ପ୍ରତିବନ୍ଧକ ହେବନି ଫ୍ଲାଟ ସାଇଜ୍ । ଏହାସହ ପୁରୁଣା ଘରର ନବୀକରଣ ପାଇଁ ଆଉ ଦରକାର ପଡ଼ିବନି ଅନୁମତି। ମଡେଲ ପ୍ଲାନ ଅନୁମତି ପାଇଁ ମଧ୍ୟ ବାରମ୍ବାର ଦୌଡ଼ିବାକୁ ପଡ଼ିବ ନାହିଁ । ଆବଶ୍ୟକ ଟଙ୍କା ଦାଖଲ କରି ଅଣ୍ଡରଟେକିଂ ଦେଇ ଗୃହ କାର୍ଯ୍ୟ ଆରମ୍ଭ କରି ହେବ।
କୋଠାବାଡ଼ି ନିର୍ମାଣ ନିୟମରେ ଏପରି ବହୁ ପରିବର୍ତ୍ତନ କରିବା ସହ ଏହାକୁ ସରଳୀକରଣ କରିଛନ୍ତି ରାଜ୍ୟ ସରକାର । ବହୁତଳ ଅଟ୍ଟାଳିକା ନିର୍ମାଣ ପାଇଁ ମଧ୍ୟ ନିୟମ କୋହଳ କରିଛନ୍ତି ରାଜ୍ୟ ସରକାର ।
ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନାଙ୍କ ସୂଚନା ଅନୁଯାୟୀ, ରାଜ୍ୟ ସରକାର ପ୍ରଥମ ଥର ପାଇଁ ଅର୍ବାନ ଡିପାଟମେଣ୍ଟ ତରଫରୁ ଓଡ଼ିଶା ଡେଭଲପମେଣ୍ଟ ଅଥରିଟି ପ୍ଲାନିଂ ଆଣ୍ଡ ବିଲ୍ଡିଂ ଷ୍ଟାଣ୍ଡାର୍ଡ ରୁଲ୍ ୨୦୨୦ ଆଣିଛନ୍ତି । ଏହି ନିୟମ ଅନୁଯାୟୀ , ବାହ୍ୟ ଭିତ୍ତିଭୂମି ଉନ୍ନତିକରଣ ଫି ଓ ଖରିଦ ଯୋଗ୍ୟ ଏଫଏଆର ଦେୟ କିସ୍ତିରେ ଦେବା ପାଇଁ ବ୍ୟବସ୍ଥା କରାଯାଇଛି ।
ଏ ସମ୍ପର୍କରେ ମନ୍ତ୍ରୀ କହିଛନ୍ତି, ନୂଆ ନିୟମ ଦ୍ୱାରା ଛୋଟ ଛୋଟ ଘର କରୁଥିବା ସାଧାରଣ ଲୋକ ହଇରାଣ ହେବେନି, ଜାଗା ସମସ୍ୟା ଦୂର ହେବ। ଉଚ୍ଚ ଅଟ୍ଟାଳିକା ନିର୍ମାଣ । ଏହି ନିୟମରେ ବିଲ୍ଡିଂ ରୁଲ୍କୁ ସରଳୀକରଣ କରାଯାଇଛି। ଏହାଦ୍ୱାରା ରିଅଲ ଇଷ୍ଟେଟରେ ଅଧିକ ଇନଭେଷ୍ଟମେଣ୍ଟ ହୋଇପାରିବ। ଜିଡିପି ବଢ଼ିବ। ସହରାଞ୍ଚଳରେ ଲୋକେ ଘର ପାଉ ନ ଥିବା ସମସ୍ୟା ଦୂର ହେବ।
କିନ୍ତୁ ଏହି ନୂଆ ନିୟମରେ ଅଗ୍ନି ନିରାପତ୍ତାକୁ ଅଧିକ ଗୁରୁତ୍ୱ ଦିଆଯାଇଛି। ସାଧାରଣ ଲୋକ ଘର କରିବାକୁ କିପରି ହଇରାଣ ହେବେନି ସେ ନେଇ ମଧ୍ୟ ଧ୍ୟାନ ଦିଆଯାଇଛି ବୋଲି କହିଲେ ମନ୍ତ୍ରୀ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
