ଭୁବନେଶ୍ୱର (ଓଡ଼ିଶା ରିପୋର୍ଟର): ଓଡ଼ିଶାକୁ ମଦମୁକ୍ତ କରିବା ପାଇଁ ରାଜ୍ୟ ସରକାରଙ୍କର କୌଣସି ପ୍ରସ୍ତାବ ନାହିଁ। ଆଜି ବିଧାନସଭାରେ ଏଭଳି ସ୍ପଷ୍ଟ ତଥ୍ୟ ରଖିଛନ୍ତି ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ।
ଏକ ତାରକା ପ୍ରଶ୍ନର ଉତ୍ତରରେ ମନ୍ତ୍ରୀ ଯୁକ୍ତି ବାଢ଼ିଛନ୍ତି, ପଡ଼ୋଶୀ ରାଜ୍ୟମାନଙ୍କରେ ନିଶା ନିବାରଣ ହୋଇନଥିବାରୁ ସେଠାରୁ ଆମ ରାଜ୍ୟକୁ ଚୋରା ମଦ ଆସିବାର ଆଶଙ୍କା ରହିଛି। ଯାହାର ସୁଯୋଗରେ ନିଶା ବ୍ୟବସାୟୀ ଅଧିକ ସକ୍ରିୟ ହେବେ। ସେପଟେ ରାଜ୍ୟରେ ବେଆଇନ ଦେଶୀ ମଦ ବିକ୍ରି ବଢୁଥିବା ନେଇ ଗୃହରେ ଉଦବେଗ ପ୍ରକାଶ ପାଇଥିଲା। ଗୋଟିଏ ଲାଇସେନ୍ସରେ ଏକାଧକ ମଦ ଦୋକାନ ଖୋଲାଯିବା, ଚଢ଼ା ଦରରେ ମଦ ବିକ୍ରି ସହ ମଦରେ ବିଷାକ୍ତ ଜିନିଷ ମିଶୁଥିବା ଖୋଦ୍ ଶାସକ ଓ ବିରୋଧୀ ସଦସ୍ୟ ଅଭିଯୋଗ ଆଣିଥିଲେ। ମନ୍ତ୍ରୀ କହିଥିଲେ, ଜିଲ୍ଲାପାଳଙ୍କ ଅଧ୍ୟକ୍ଷତାରେ ଏସବୁ ରୋକିବାକୁ ସ୍କ୍ୱାଡ ଗଠନ କରାଯାଇ ଚଢ଼ଉ କରାଯାଉଛି।