୯୫ଜଣ ଯନ୍ତ୍ରୀଙ୍କ ବଦଳି

ଭୁବନେଶ୍ୱର(ଓଡ଼ିଶା ରିପୋର୍ଟର): ପୂର୍ତ୍ତ ବିଭାଗ ଅଧୀନରେ ଦୀର୍ଘବର୍ଷ ଧରି ଗୋଟିଏ ଜିଲ୍ଲା ବା ସ୍ଥାନରେ କାର୍ଯ୍ୟ କରୁଥିବା ୯୫ଜଣ ଯନ୍ତ୍ରୀଙ୍କୁ ରାଜ୍ୟ ସରକାର ବଦଳି କରିଛନ୍ତି। ସେପ୍ଟେମ୍ବର ମାସରେ ପୂର୍ତ୍ତ ବିଭାଗ ଯନ୍ତ୍ରୀମାନଙ୍କ ପାଇଁ ନୂଆ ବଦଳି ନୀତି ଲାଗୁ କରିବା ପରେ ପ୍ରଥମଥର ଯନ୍ତ୍ରୀମାନଙ୍କ ଏତେ ବଡ଼ଧରଣର ବଦଳି ହୋଇଛି। ନିର୍ବାହୀ ଯନ୍ତ୍ରୀ ଓ ସହାୟକ ନିର୍ବାହୀ ଯନ୍ତ୍ରୀ ପାହ୍ୟାରେ ଏହି ବଦଳି ହୋଇଛି । ମୋଟ ୯୫ଜଣ ଯନ୍ତ୍ରୀଙ୍କୁ ବିଭିନ୍ନ ସ୍ଥାନକୁ ବଦଳି କରାଯାଇଛି। ଯେଉଁ ଯନ୍ତ୍ରୀମାନେ ନିଜସ୍ୱ ସବଡିଭିଜନରେ ଥିଲେ ସେମାନେ ଏହି ବଦଳି ପ୍ରକ୍ରିୟାରେ ସାମିଲ ଥିବା ଜଣାପଡ଼ିଛି। ତେବେ ପଞ୍ଚାୟତିରାଜ, ନଗର ଉନ୍ନୟନ, ଗ୍ରାମ୍ୟ ଉନ୍ନୟନ ଓ ଜଳସମ୍ପଦ ବିଭାଗ ଅଧୀନରେ ଥିବା ଯନ୍ତ୍ରୀମାନେ ଦୀର୍ଘବର୍ଷ ଧରି ଗୋଟିଏ ଲେଖାଏ ଜିଲ୍ଲା ଓ ସ୍ଥାନରେ କାର୍ଯ୍ୟ କରୁଥିଲେ ମଧ୍ୟ ସେମାନଙ୍କ ବଦଳି କରିବା ଦିଗରେ ସରକାର ଆଗ୍ରହ ଦେଖାଉନାହାନ୍ତି।