ଭୁବନେଶ୍ୱର/ବାଲେଶ୍ୱର/ସୋର (ଓଡ଼ିଶା ରିପୋର୍ଟର): ବିଭିନ୍ନ କାରଣରୁ ରାଜ୍ୟର ୩ଟି କଲେଜରେ ସାଇନ୍-ଏ-ଡାଏ ଘୋଷଣା କରାଯାଇଛି। ଏସବୁ କଲେଜ ହେଲା ଯାଜପୁରର ବ୍ୟାସନଗର କଲେଜ, ବାଲେଶ୍ୱର ଜିଲ୍ଲା ଔପଦା କଲେଜ ଓ ନୀଳଗିରିର ସ୍ୱର୍ଣ୍ଣଚୂଡ଼ କଲେଜ।
ବ୍ୟାସନଗର କଲେଜରେ ୟୁସିଜି ପାଣ୍ଠି ଘୋଟାଲାକୁ ନେଇ ଉତ୍ତେଜନା ଦେଖା ଦେଇଥିଲା। ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଉଥିବା ଦେଖି କର୍ତ୍ତୃପକ୍ଷ କଲେଜକୁ ସାଇନ-ଏ- ଡାଏ ଘୋଷଣା କରିଥିଲେ।
ସେହିପରି ବାଲେଶ୍ୱର ଜିଲ୍ଲା ଔପଦା କଲେଜରେ ପରୀକ୍ଷା ଫି’ ବୃଦ୍ଧିକୁ ନେଇ ଗଣ୍ଡଗୋଳ ହୋଇଥିଲା। ଫି’ ବୃଦ୍ଧିକୁ ଛାତ୍ରଛାତ୍ରୀମାନେ ତୀବ୍ର ବିରୋଧ କରିଥିଲେ। ଅଧ୍ୟକ୍ଷଙ୍କ ସହ ଆଲୋଚନା ପରେ ମଧ୍ୟ ସମସ୍ୟା ସମାଧାନ ହୋଇନଥିଲା। ପରେ ଉତ୍ତେଜନା ନଥମିବାରୁ କଲେଜ କର୍ତ୍ତୃପକ୍ଷ ସାଇନ-ଏ-ଡାଏ ଘୋଷଣା କରିଥିଲେ।
ବାଲେଶ୍ୱର ଜିଲ୍ଲା ନୀଳଗିରି ସ୍ୱର୍ଣ୍ଣଚୂଡ଼ କଲେଜକୁ ମଧ୍ୟ ସାଇନ-ଏ- ଡାଏ ଘୋଷଣା କରାଯାଇଛି। ସେଠାରେ ନିର୍ବାଚନ ପୂର୍ବରୁ ଉତ୍ତେଜନା ମୂଳକ ସ୍ଥିତି ପରିଲକ୍ଷିତ ହୋଇଥିଲା। ଏପରିକି ଗତକାଲି ରାତିରେ କଲେଜ ଫାଟକରେ କିଛି ଦୁର୍ବୃତ୍ତ ତାଲା ପକାଇ ଦେଇଥିଲେ।