ଭୁବନେଶ୍ୱର (ଓଡ଼ିଶା ରିପୋର୍ଟର): କୁକୁର ଛୁଆଙ୍କ ଉପରେ ଗାଡ଼ି ଚଢ଼ାଇ ମାରିବା ମହଙ୍ଗା ପଡ଼ିଛି। ଗିରଫ ହୋଇଛନ୍ତି କ୍ୟାବ୍ ଡ୍ରାଇଭର୍ କାହ୍ନୁ ଚରଣ ଗିରି। ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
କାହ୍ନୁ ଚରଣ ଗିରି ପେଶାରେ ଜଣେ କ୍ୟାବ୍ ଡ୍ରାଇଭର। ଗତକାଲି ସକାଳେ ସେ ଶୈଳଶ୍ରୀ ବିହାର ସ୍ଥିତ ହାଇଲାଣ୍ଡ ରେସିଡେନ୍ସି ଅଞ୍ଚଳକୁ ଆସିଥିଲେ। ଏହି ସମୟରେ ସେ ଦ୍ରୁତ ଗତିରେ ଗାଡ଼ି ଚଲାଉଥିବା ଦେଖିବାକୁ ମିଳିଥିଲା। ଯାହାକୁ ସ୍ଥାନୀୟ ଅଞ୍ଚଳରେ ମୁତୟନ ହୋଇଥିବା ସିକ୍ୟୁରିଟି ଗାର୍ଡମାନେ ମନା କରିଥିଲେ। ଏପରିକି ଦ୍ରୁତ ଗତି ଗଡ଼ି ଚଳାଇବାକୁ ମନା କରିଥିଲେ। ଏହା ସତ୍ତ୍ୱେ କାହ୍ନୁ ଦ୍ରୁତ ଗତିରେ ଗାଡ଼ି ଚଳାଉ ଥିଲେ। ଗାଡ଼ିଟି ୪ଟି କୁକୁର ଛୁଆଙ୍କ ଉପରେ ମାଡ଼ି ଯାଇଥିଲା। ଫଳରେ କୁକୁର ଛୁଆଙ୍କର ମୃତ୍ୟୁ ଘଟିଥିଲା।
ଏନେଇ ପ୍ୟୁପ୍ଲସ୍ ଫର୍ ଆନିମଲ୍ ପକ୍ଷରୁ ଚନ୍ଦ୍ରଶେଖରପୁର ଥାନାରେ ଲିଖିତ ଅଭିଯୋଗ ହୋଇଥିଲା। ପୁଲିସ ମାମଲା ରୁଜୁ କରି କ୍ୟାବ ଡ୍ରାଇଭର କାହ୍ନୁକୁ ଗିରଫ କରି କୋର୍ଟ ଚାଲାଣ କରିଛି।