ବଜ୍ରାଘାତରେ ପରିବାରର ଜଣଙ୍କ ମୃତ୍ୟୁ, ୭ ଆହତ

ଲମତାପୁଟ (ଓଡ଼ିଶା ରିପୋର୍ଟର): ବଜ୍ରାଘାତରେ ପରିବାରର ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ ୭ ଜଣ ଆହତ ହୋଇଛନ୍ତି। ଆଜି ଅପରାହ୍ଣରେ ଏହି ଘଟଣା ଘଟିଛି କୋରାପୁଟ ଜିଲ୍ଲା ଲମତାପୁଟ ବ୍ଳକ୍‌ ଅନ୍ତର୍ଗତ ସିଲପଡ଼ା ଗାଁରେ।

ମୃତକ ଜଣେ ମହିଳା। ସେ ହେଉଛନ୍ତି ଗାଁର ରଘୁନାଥ କ୍ରିସାନିଙ୍କ ବୋହୂ।

ଆଜି ଅପରାହ୍ଣରେ ରଘୁନାଥ ଓ ତାଙ୍କ ପରିବାର ଲୋକେ ଜମିରେ ଥିଲେ। ଏହି ସମୟରେ ଘଡ଼ଘଡ଼ି ସହିତ ବର୍ଷା ହୋଇଥିଲା।  ବର୍ଷା ଯୋଗୁ ରଘୁନାଥ ଓ ତାଙ୍କ ପରିବାରର ଅନ୍ୟ ସଦସ୍ୟମାନେ ଘରକୁ ଫେରି ଆସିଥିଲେ। ସେମାନେ ସମସ୍ତେ ଘର ବାରଣ୍ଡାରେ ବସିଥିଲେ। ଏହି ସମୟରେ ତାଙ୍କ ଘରକୁ ଲାଗି ଥିବା ତେନ୍ତୁଳି ଗଛରେ ବଜ୍ରପାତ ହୋଇଥିଲା। ଫଳରେ ସମସ୍ତେ ଅଚେତ ହୋଇଯାଇଥିଲେ। ଗାଁ ଲୋକେ ସେମାନଙ୍କୁ ଲମତାପୁଟ ହସ୍‌ପିଟାଲ୍ ଆଣିଥିଲେ।

ରଘୁନାଥ କ୍ରିସାନିଙ୍କ ବୋହୂଙ୍କ ମୃତ୍ୟୁ ଘଟିଥିବା ବେଳେ ଆଉ ୩ ଜଣଙ୍କୁ ଅଧିକ ଚିକିତ୍ସା ପାଇଁ କୋରାପୁଟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।