ସମାନ ଦାବି ନେଇ ପୂର୍ବରୁ ମଧ୍ୟ କର୍ମଚାରୀମାନେ ଆନ୍ଦୋଳନ କରିଥିଲେ। ତେବେ ସେମାନଙ୍କ ଦାବି ଅଗଷ୍ଟ୧୫ ତାରିଖ ସୁଦ୍ଧା ପୂରଣ କରାଯିବାକୁ ମାଲିକ ସଂଘ ପ୍ରତିଶ୍ରୁତି ଦେଇଥିଲା। ହେଲେ ଆଜି ଯାଏଁ ପ୍ରତିଶ୍ରୁତି ପାଳନ କରାଯାଇ ନ ଥିବାରୁ ଦାବି ପୂରଣ ଯାଏଁ ଆନ୍ଦୋଳନ ଚାଲିବ ବୋଲି ଡମ୍ପର ଡ୍ରାଇଭର ଓ ହେଲପରମାନେ ଚେତାବନୀ ଦେଇଛନ୍ତି।
ଜଣେ ଡମ୍ପର ଡ୍ରାଇଭର କହିଛନ୍ତି,“ ଆମେ ଦୀର୍ଘ ବର୍ଷ ହେବ ପାରାଦୀପ ବନ୍ଦରରେ କାମ କରି ଆସୁଛୁ। ଡମ୍ପର ଡ୍ରାଇଭର ଓ ହେଲପରଙ୍କ ଅକ୍ଲାନ୍ତ ପରିଶ୍ରମ ପାଇଁ ପାରାଦୀପ ବନ୍ଦର ଦ୍ୱିତୀୟ ଶ୍ରେଣୀର ମାନ୍ୟତା ପାଇଛି। ହେଲେ ବନ୍ଦର ପ୍ରଶାସନ ଓ ଷ୍ଟିପର ଆସୋସିଏନ୍ ଆମ ରକ୍ତକୁ ସବୁ ଦିନ ପାଇଁ ଶୋଷି ଚାଲିଛନ୍ତି। ଏବେ ସୁଦ୍ଧା ତାଙ୍କ ନିଦ ଭାଙ୍ଗି ନାହିଁ। ଆମେ କେମିତି ଭଲରେ ରହିବୁ ସେହି କଥା ଚିନ୍ତା କରୁ ନାହାଁନ୍ତି। ସରକାରଙ୍କ ନିୟମ ଅନୁସାରେ ଜଣେ ଶ୍ରମିକ ୮ ଘଣ୍ଟାରୁ ଅଧିକ କାମ କରିବା କଥା ନୁହଁ ,ହେଲେ ଆମେ ୧୨ ଘଣ୍ଟା ପରିଶ୍ରମ କରୁଛୁ। କିନ୍ତୁ ସେହି ଅନୁସାରେ ଆମେ ଦରମା ପାଉ ନାହୁଁ।”
ସେ କହିଛନ୍ତି,“ଆମେ ମାସକୁ ୯ ହଜାର ୨ଶହ ଟଙ୍କା ଦରମା ପାଉଛୁ। ସେଥିରୁ ୭୫୦ ଟଙ୍କା ଖାଇବା ବାବଦକୁ କଟା ଯାଉଛି। ସେହିପରି ପ୍ରଭିଡେଣ୍ଟ୍ ଫଣ୍ଡ୍ ନାଁରେ ୧୬ ମାସ ହେବ ଆମ ଦରମା କଟା ଯାଉଛି। କିନ୍ତୁ ଏନେଇ ଆମକୁ କିଛି ରସିଦ୍ ଦେଉ ନାହାଁନ୍ତି। ଆମକୁ ଜୋତା, କ୍ୟାପ୍ ଓ ହେଲମେଣ୍ଟ ଦିଆଯାଉ ନ ଥିବାରୁ ଜୀବନକୁ ପାଣି ଛଡାଇ ଧୂଳିରେ କାମ କରୁଛୁ। ଆମର ଇସ୍ଏଆଇ ମଧ୍ୟ ନାହିଁ। ଶରୀର ଅସୁସ୍ଥ ହେଲେ ଆମେ ଚିକିତ୍ସା ମଧ୍ୟ କରିପାରୁ ନାହୁଁ। ଯେତିକି ଦରମା ପାଉଛୁ ଏହି ମହଙ୍ଗା ଦୁନିଆରେ ଚଳିବା ଅସୁବିଧା ହେଉଛି।”