ନୂଆପଡ଼ା(ମାୟାଧର ସରାଫ): ୪୦୦୦ ଟଙ୍କା ଲାଞ୍ଚ ନେବା କାଳ ହେଲା । ଭିଜିଲାନ୍ସ ହାତରେ ଧରା ପଡ଼ିଗଲେ ପ୍ରିନ୍ସିପାଲ। ନିଜ ସହକର୍ମୀ ଟିଜିଟି ଶିକ୍ଷକଙ୍କ ଏରିୟର ଇଂକ୍ରିମେଣ୍ଟ ବାହାର କରିବା ପାଇଁ ୪୦୦୦ ଟଙ୍କା ଲାଞ୍ଚ ନେଉଥିବା ବେଳେ ଧରିଦେଲା ଭିଜିଲାନ୍ସ। ଶେଷରେ ଭିଜିଲାନ୍ସ ଜାଲରେ ପଡ଼ିଗଲେ ନୂଆପଡା ଜିଲ୍ଲା ଖଡିଆଳ ବ୍ଲକ ବାଦୀ ଆଦର୍ଶ ବିଦ୍ୟାଳୟର ପ୍ରିନ୍ସିପାଲ ସୁଜନ କୁମାର ସାହୁ ।
ସୂଚନାଯୋଗ୍ୟ, ପ୍ରିନ୍ସିପାଲ ସୁଜନ କୁମାର ସାହୁଙ୍କୁ ବିଦ୍ୟାଳୟର ଟିଜିଟି ଶିକ୍ଷକ ରାମକୃଷ୍ଣ ପ୍ରଧାନ ଏରିୟର ଇଂକ୍ରିମେଣ୍ଟ ବାହାର କରିବା ପାଇଁ ଅନୁରୋଧ କରିଥିଲେ। ମାତ୍ର ଏଥିନିମନ୍ତେ ୪୦୦୦ ଟଙ୍କା ଦେବାକୁ ପ୍ରିନ୍ସିପାଲ କହିଥିଲେ। ଏନେଇ ରାମକୃଷ୍ଣ ଭିଜିଲାନ୍ସ ଦ୍ୱାରସ୍ଥ ହୋଇଥିଲେ।
ଏହାପରେ ପୂର୍ବ ଯୋଜନା ମୁତାବକ, ଆଜି ରାମକୃଷ୍ଣ ପ୍ରିନ୍ସିପାଲଙ୍କୁ ତାଙ୍କ ଅଫିସ୍ ଚାମ୍ବରରେ ରଙ୍ଗ ବୋଳା ୪ ହଜାର ଟଙ୍କା ଦେଇଥିଲେ। ଉକ୍ତ ସମୟରେ ପୂର୍ବ ଯୋଜନା ମୁତାବକ ଛପି ରହିଥିବା ନୂଆପଡା ଓ କଳାହାଣ୍ତି ଭିଜିଲାନ୍ସ ଟିମ୍ ପ୍ରିନ୍ସିପାଲଙ୍କୁ କାବୁ କରିବା ସହ ରଙ୍ଗ ବୋଳା ନୋଟ୍ ଜବତ କରିଛନ୍ତି।