କଟକ (ଓଡ଼ିଶା ରିପୋର୍ଟର): ପାରିବାରିକ କଳହରୁ ଗତକାଲି କାଠଯୋଡ଼ି ପୋଲ ଉପରୁ ଉଛୁଳା ନଦୀକୁ ଡେଇଁ ପଡ଼ିଥିବା ଯୁବକଙ୍କର ଏ ଯାଏ ପତ୍ତା ମିଳିନି। କାଲି ଓଡ୍ରାଫ୍ ଟିମ୍ ପକ୍ଷରୁ ଖୋଜାଖୋଜି ଆରମ୍ଭ ହୋଇଥିବା ବେଳେ ଆଜି ଦ୍ୱିତୀୟ ଦିନରେ ବି ଉଦ୍ଧାର କାର୍ଯ୍ୟ ଜାରି ରହିଛି। ଏଥିରେ ଓଡ୍ରାଫ୍ ଟିମ୍, ଅଗ୍ନିଶମ କର୍ମଚାରୀ ସାମିଲ ହୋଇଛନ୍ତି।
ସୂଚନାଯୋଗ୍ୟ ଯେ, ଗତକାଲି ମଧ୍ୟାହ୍ନ ସମୟରେ ନିଆଳି ଅଞ୍ଚଳର ଦେବବ୍ରତ ମହାପାତ୍ର ବାଇକ୍ରେ କଟକରୁ ନଖରା ଅଭିମୁଖେ ଆସୁଥିଲେ। ସାଥୀରେ ଥିଲେ ତାଙ୍କର ପତ୍ନୀ ଓ ପୁଅ। ତେବେ ହଠାତ୍ ଦେବବ୍ରତ ନିଜ ବାଇକ୍କୁ କାଠଯୋଡ଼ି ପୋଲ ଉପରେ ରଖି ପତ୍ନୀ ଓ ପୁଅଙ୍କ ସମ୍ମୁଖରେ ଭରା ନଈକୁ ଡେଇଁ ପଡ଼ିଥିଲେ। ଚାହୁଁ ଚାହୁଁ କାଠଯୋଡିର ପ୍ରଖର ସୁଅରେ ଭାସି ଯାଇଥିଲେ ଦେବବ୍ରତ । ଏପଟେ ନିଜ ଆଖି ସାମ୍ନାରେ ଏହି ଘଟଣା ଦେଖି ହତବାକ୍ ହୋଇ ପଡ଼ିଥିଲେ ପତ୍ନୀ। ଏମିତିକି ସେ ମଧ୍ୟ ୪ ବର୍ଷର ପୁଅକୁ ଧରି ନଦୀକୁ ଡେଇଁବାକୁ ଉଦ୍ୟମ କରୁଥିଲେ। ତେବେ ରାସ୍ତାରେ ଯାଉଥିବା ଜଣେ ମହିଳା ତାଙ୍କୁ ଧରି ପକାଇଥିଲେ।
ସୂଚନା ଅନୁସାରେ, ନଈକୁ ଡେଇଁଥିବା ଦେବବ୍ରତଙ୍କ ଘର ନିଆଳି ଥାନା କରଞ୍ଜ ଗାଁରେ। ୫ ବର୍ଷ ତଳେ ସେ ଜଣେ ହାଇସ୍କୁଲ ଶିକ୍ଷୟିତ୍ରୀଙ୍କୁ ବିବାହ କରିଥିଲେ। ବିବାହ ସମୟରେ ସେ ଯାଜପୁରରେ ଏକ ଘରୋଇ କମ୍ପାନୀରେ ଚାକିରି କରୁଥିବା କହିଥିଲେ। ମାତ୍ର ଦେବବ୍ରତ କିଛି କାମ କରୁନଥିବା ତାଙ୍କ ଶ୍ୱଶୁର ଅଭିଯୋଗ କରିଛନ୍ତି। ଯାହାକୁ ନେଇ ଅନେକ ସମୟରେ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଝଗଡ଼ା ହେଉଥିବା ଅଭିଯୋଗ ହୋଇଛି।
ଅଘଟଣ ପରେ ତୁରନ୍ତ ଦେବବ୍ରତଙ୍କୁ ଉଦ୍ଧାର ଲାଗି ଅଗ୍ନିଶମ ବାହିନୀର ୩ଟି ପାଓ୍ୱାର ବୋଟ୍ ଓ ଓଡ୍ରାଫ୍ ଟିମ୍ର ଗୋଟିଏ ପାଓ୍ୱାର ବୋଟ୍ ସହ ୨ ଜଣ ସ୍କୁବା ଡାଇଭରଙ୍କ ସହାୟତା ନିଆଯାଇଛି। ହେଲେ ଅଦ୍ୟାବଧି ତାଙ୍କର ପତ୍ତା ମିଳିନି।