ରାଉରକେଲା(ସତ୍ୟାନନ୍ଦ ମହାନ୍ତି): ସୁନ୍ଦରଗଡ଼ ଜିଲ୍ଲା ବୀରମିତ୍ରପୁର ଥାନା ଅନ୍ତର୍ଗତ କାଲସେରିଆ ନିକଟରେ ଏକ ସ୍କର୍ପିଓ ରାସ୍ତା କଡ଼ରେ ଥିବା ଗଛରେ ପିଟି ହେବାରୁ ଡ୍ରାଇଭରଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଆହତ ହୋଇଛନ୍ତି। ମୃତକଙ୍କ ନାଁ ଦୀପ୍ କୁମାର ଖେସ। ଆହତମାନେ ସମସ୍ତେ କୁଆରମୁଣ୍ଡାରେ ଥିବା ଡନ୍ ବାସ୍କୋ ଆଇଟିଆଇ କଲେଜ ଛାତ୍ର ବୋଲି ଜଣାପଡ଼ିଛି।
ସୂଚନାଅନୁସାରେ, ଗତକାଲି ଆଇଟିଆଇ କଲେଜର ଜଣେ କର୍ମଚାରୀଙ୍କ ପୁଅଙ୍କର ବୀରମିତ୍ରପୁର ଥାନା ଅନ୍ତର୍ଗତ ଝୁରମୁରରେ ମୃତ୍ୟୁ ଘଟିଥିଲା। ଏହି ଛାତ୍ରମାନେ ଶବ ତ୍ସକାର ସାରି ଏକ ସ୍କର୍ପିଓରେ ଫେରିବା ବେଳେ କାଲସେରିଆଠାରେ ସେମାନଙ୍କ ଗାଡ଼ି ରାସ୍ତା କଡ଼ରେ ଥିବା ଗଛରେ ପିଟି ହୋଇଯାଇଥିଲା। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ରାଉରକେଲା ସରକାରୀ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରେ ଡ୍ରାଇଭରଙ୍କ ମୃତ୍ୟୁ ଘଟିଥିଲା। ୫ ଜଣ ଛାତ୍ରଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ଇସ୍ପାତ ଜେନେରାଲ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି। ରାହୁଲ ସାହୁ ନାମକ ଜଣେ ଛାତ୍ର ରାଉରକେଲା ସରକାରୀ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।