ଭୁବନେଶ୍ୱର(ଓଡ଼ିଶା ରିପୋର୍ଟର): ଗତବର୍ଷ କରୋନା ମହାମାରୀ ପାଇଁ ଗଡ଼ିପାରି ନ ଥିଲା ଶ୍ରୀ ଲିଙ୍ଗରାଜଙ୍କ ରୁକୁଣା ରଥ। ରଥ ନିର୍ମାଣ ଶେଷ ହୋଇ ମଧ୍ୟ ଶେଷ ମୁହୂର୍ତ୍ତରେ କରୋନା ପାଇଁ ଏହି ଯାତ୍ରାକୁ ବନ୍ଦ କରାଯାଇଥିଲା । ଚଳିତ ବର୍ଷ ଏହି ରଥ ଯାତ୍ରା ଧୁମଧାମରେ ଆୟୋଜିତ ହେବ ବୋଲି ଶ୍ରଦ୍ଧାଳୁ ଆଶା କରିଥିବା ବେଳେ ଏଥର ମଧ୍ୟ ମହାମାରୀ ଲୋକଙ୍କ ଆଶାରେ ପାଣି ପକାଇ ଦେଇଛି।
ଆସନ୍ତା ୨୦ରେ ଗଡ଼ିବ ରୁକୁଣା ରଥ। ତାହା ପୁଣି ବିନା ଭକ୍ତରେ। ଦିନକୁ ଦିନ କରୋନା ସଂକ୍ରମଣ ବଢୁଥିବାରୁ ଏହି ନିଷ୍ପତ୍ତି ନେଇଛି ବିଏମ୍ସି । ଏଥିପାଇଁ ରାଜ୍ୟ ସରକାର ମଧ୍ୟ ମୋହର ଲଗାଇ ସାରିଛନ୍ତି।
କୋଭିଡକୁ ଦେଖି ବିନା ଭକ୍ତରେ କେମିତି ରୁକୁଣା ରଥ ଆୟୋଜନ ହେବ, ସେଥପାଇଁ ଭୁବନେଶ୍ୱର ମହାନଗର ନିଗମ ପକ୍ଷରୁ SOP ଜାରି କରାଯାଇଛି । ଏହି ଏସ୍ଓପି ଅନୁସାରେ ରୁକୁଣା ରଥରେ କେବଳ ସେବାୟତ ଭାଗ ନେବେ । କୌଣସି ଭକ୍ତ ଭାଗ ନେଇପାରିବେ ନାହିଁ। ଯେଉଁ ସେବାୟତମାନେ ଭାଗ ନେବେ, ୪୮ ଘଣ୍ଟା ପୂର୍ବରୁ ସେମାନଙ୍କର RT PCR ଟେଷ୍ଟ କରାଯିବ। ଯାହାର ନେଗେଟିଭ ରିପୋର୍ଟ ଆସିବ, କେବଳ ସେମାନେ ହିଁ ରୁକୁଣା ରଥଯାତ୍ରାରେ ଭାଗ ନେଇପାରିବ । କୋଭିଡ ନେଗେଟିଭ ବ୍ୟକ୍ତି ମଧ୍ୟ ମାସ୍କ ପିନ୍ଧିବାକୁ ବାଧ୍ୟ।
ରୁକୁଣା ରଥଯାତ୍ରା ବେଳେ ଖାଇବା ଦୋକାନ, ମିନା ବଜାର, ସାଂସ୍କୃତିକ କାର୍ଯ୍ୟକ୍ରମକୁ ସଂପୂର୍ଣ୍ଣ ବାରଣ କରାଯାଇଛି । ଏପରିକି ବାଣ ମଧ୍ୟ ଫୁଟା ଯାଇପାରିବ ନାହିଁ ।
ରୁକୁଣା ରଥଯାତ୍ରା ଆୟୋଜନ ନେଇ ଗତକାଲି ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀଙ୍କ ଅଧ୍ୟକ୍ଷତାରେ ଏକ ବୈଠକ ବସିଥିଲା । ବିଡିଏ କାର୍ଯ୍ୟାଳୟରେ ବସିଥିବା ବୈଠକରେ ୪ ନିଯୋଗ, ମନ୍ଦିର ପ୍ରଶାସନ, ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ଯୋଗ ଦେଇଥିଲେ । ସମସ୍ତଙ୍କ ସହିତ ପୁଙ୍ଖାନୁପୁଙ୍ଖ ଭାବେ ଆଲୋଚନା କରାଯାଇଥିଲା । ଆସନ୍ତା ୨୦ରେ ରୁକୁଣା ରଥଯାତ୍ରା ହେବ । ଗତ ବର୍ଷ ଏହା ହୋଇପାରିନଥିଲା। ରଥ ନିର୍ମାଣ ହୋଇଥିଲେ ସୁଦ୍ଧା ଶେଷ ମୁହୂର୍ତ୍ତରେ କରୋନା ପାଇଁ ରୁକୁଣା ରଥ ଯାତ୍ରାକୁ ବନ୍ଦ କରାଯାଇଥିଲା ।
ସୂଚନାଯୋଗ୍ୟ, ରାଜ୍ୟରେ ପୁଣି ଥରେ କରୋନା ସଂକ୍ରମଣ ଦ୍ରୁତଗତିରେ ବଢ଼ିବା ପରେ ଆଜି ପ୍ରଥମ ଥର ପାଇଁ ଦୈନିକ ଆକ୍ରାନ୍ତଙ୍କ ସଂଖ୍ୟା ୧୦୦୦ ଡେଇଁଛି। ସୂଚନା ଓ ଲୋକ ସଂପର୍କ ବିଭାଗ ଦେଇଥିବା ସୂଚନା ଅନୁଯାୟୀ, ଗତ ୨୪ ଘଣ୍ଟାରେ ରାଜ୍ୟରେ ୧୨୮୨ ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସୁନ୍ଦରଗଡ଼ ଜିଲ୍ଲାରୁ ସର୍ବାଧିକ ୨୨୪ ଜଣ ଚିହ୍ନଟ ହୋଇଥିବା ବେଳେ ଖୋର୍ଦ୍ଧାରୁ ୧୯୨ ଓ କଳାହାଣ୍ଡିରୁ ୧୦୮ ଜଣ ଚିହ୍ନଟ ହୋଇଛନ୍ତି।