କୋରାପୁଟ(ସୂର୍ଯ୍ୟନାରାୟଣ ପଣ୍ଡା): ଶିକ୍ଷାର ମନ୍ଦିରରେ କଳଙ୍କର ଛିଟା ପଡ଼ିଛି। ଯେଉଁ ସାର୍ ପିଲାଙ୍କୁ ପାଠ ପଢ଼ାଇ ସେମାନଙ୍କୁ ଉଜ୍ଜ୍ୱଳ ଭବିଷ୍ୟତର ସ୍ୱପ୍ନ ଦେଖାଉଥିଲେ, ସିଏ ସାଜିଲେ ଶଇତାନ। କ୍ଲାସ୍ ରୁମ୍ରେ ଏକୁଟିଆ ପାଇ ଜଣେ ଛାତ୍ରୀଙ୍କୁ ଅଶ୍ଲୀଳ ଇଙ୍ଗିତ କରିଥିବା ଅଭିଯୋଗ ହୋଇଛି। ନଟି ସାର୍ଙ୍କ ଏପରି ଡାର୍ଟି କାମର ଖବର କୋରାପୁଟ ଜିଲ୍ଲାରୁ ଆସିଛି।
୮ମ ଶ୍ରେଣୀରେ ପଢ଼ୁଥିବା ଛାତ୍ରୀ ଜଣକ ସବୁଦିନ ପରି ଶନିବାର ସ୍କୁଲ ଯାଇଥିଲେ। ସାର୍ଙ୍କ କ୍ଲାସ ସରିବା ପରେ ସେ ଛାତ୍ରୀଙ୍କୁ ଏକୁଟିଆ ଡାକିଥିଲେ। ଆଉ ସୁନା ପିଲାଟି ପରି ଛାତ୍ରୀ ଜଣଙ୍କ ସାର୍ଙ୍କ ପାଖକୁ ଯାଇଥିଲେ। ଏହାର ସୁଯୋଗ ନେଇ ସାର୍ ଛାତ୍ରୀଙ୍କ ସମ୍ୱେଦନଶୀଳ ଅଙ୍ଗରେ ହାତ ଲଗାଇଥିଲେ। ଶିକ୍ଷକଙ୍କ ଏପରି ଆଚରଣ ଦେଖି ଛାତ୍ରୀ ଜଣକ କାନ୍ଦି ପକାଇଥିଲେ। ପରେ ଘରକୁ ଆସି ଛାତ୍ରୀ ଜଣଙ୍କ ପରିବାର ଲୋକଙ୍କ ପାଖରେ ଏ ବିଷୟରେ ଅଭିଯୋଗ କରିଥିଲେ।
ଆଜି ସନ୍ଧ୍ୟାରେ ଛାତ୍ରୀଙ୍କ ଜେଜେ ଏନେଇ କୋରାପୁଟ ସଦର ଥାନାରେ ଲିଖିତ ଅଭିଯୋଗ କରିଥିଲେ। ସମ୍ପୃକ୍ତ ଶିକ୍ଷକ ଅନ୍ୟ ଛାତ୍ରୀମାନଙ୍କ ସହ ଏପରି ଆଗରୁ କରୁଥିବା କଥା ଅଭିଯୋଗ ପତ୍ରରେ ଉଲ୍ଲେଖ ରହିଛି।