ବାଲିଗୁଡ଼ା (ଓଡ଼ିଶା ରିପୋର୍ଟର): ସ୍କର୍ପିଓ ଚଢ଼ି ଯିବାରୁ ଜଣେ ସୁଇପରଙ୍କ ମୃତ୍ୟୁ ଘଟିଛି। ଘଟଣାଟି ଘଟିଛି କନ୍ଧମାଳ ଜିଲ୍ଲା ତୁମୁଡିବନ୍ଧରେ।
ମୃତକ ଜଣଙ୍କ ହେଉଛନ୍ତି ପାନବୁଡୁ ନାୟକ। ତାଙ୍କ ଘର ଝିରିପାଣି ଅଞ୍ଚଳ। ଦୀର୍ଘ ଦିନ ଧରି ସେ ତୁମୁଡ଼ିବନ୍ଧରେ ରହି ସୁଇପର ଭାବେ କାର୍ଯ୍ୟ କରି ଆସୁଥିଲେ।
ଆଜି ସକାଳେ ତୁମୁଡ଼ିବନ୍ଧ ଜଗନ୍ନାଥ ମନ୍ଦିର ନିକଟ ମୁଖ୍ୟ ରାସ୍ତାରେ ଝାଡୁ କରୁଥିବା ସମୟରେ ଏକ ସ୍କର୍ପିଓ ତାଙ୍କ ଉପରେ ଚଢ଼ି ଯାଇଥିଲା। ତାଙ୍କୁ ଗୁରୁତର ଅବସ୍ଥାରେ ତୁମୁଡ଼ିବନ୍ଧ ହସ୍ପିଟାଲ ନିଆଯାଇଥିଲା। ତେବେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ତୁମୁଡ଼ିବନ୍ଧ ପୁଲିସ ସମ୍ପୃକ୍ତ ସ୍କର୍ପିଓକୁ ଜବତ କରିବା ସହ ଡ୍ରାଇଭରକୁ ଅଟକ ରଖି ପଚରାଉଚରା କରୁଛି।
ସୂଚନାଯୋଗ୍ୟ, ଏହି ସ୍କର୍ପିଓରେ କିଛି ପର୍ଯ୍ୟଟକ ଥିଲେ। ସେମାନେ ନୟାଗଡ଼ ଜିଲ୍ଲାର। ସେମାନେ କୋରାପୁଟରୁ ବୁଲାବୁଲି କରି ଫେରୁଥିବା ବେଳେ ଏହି ଦୁର୍ଘଟଣା ଘଟିଥିଲା।