ବାଲେଶ୍ୱର: ବିଲ୍ କାମ ପାଇଁ ମଜୁରିଆ ଭାବେ ଆସି କାମ କରୁଥିବା ଜଣେ ବ୍ୟକ୍ତିର କୋଦାଳ ଚୋଟରେ ବାଲେଶ୍ୱର ଜିଲ୍ଲା ରାଇବଣିଆ ଥାନା ଖମାର ଗାଁର ସୁଶୀଲ କୁମାରଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଏନେଇ ଥାନାରେ ଅଭିଯୋଗ ହେବା ପରେ ପୋଲିସ ଅଭିଯୁକ୍ତ ରଘୁବୀରକୁ ଅଟକ ରଖି ପଚରାଉଚରା କରୁଛି।
ଅଭିଯୋଗ ଅନୁସାରେ, ୧୦ ଦିନ ପୂର୍ବେ ସୁଶୀଲ ରଘୁବୀରକୁ ବିଲ୍ କାମ ପାଇଁ ଘରକୁ ଆଣିଥିଲେ। ଗତକାଲି ଖରାବେଳେ ସୁଶୀଲ ଶୋଇଥିବା ସମୟରେ ରଘୁବୀର ଏକ କୋଦାଳରେ ତାଙ୍କୁ ଆକ୍ରମଣ କରିଥିଲା। ଗୁରୁତର ଅବସ୍ଥାରେ ତାଙ୍କୁ ଜଳେଶ୍ୱର ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ବାଲେଶ୍ୱର ସ୍ଥାନାନ୍ତର କରାଯାଇଥିଲା। ହେଲେ ରାସ୍ତାରେ ତାଙ୍କର ମୃତ୍ୟୁ ଘଟିଥିଲା।
ଖବର ପାଇଁ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ହତ୍ୟାର କାରଣ ସ୍ପଷ୍ଟ ହୋଇନାହିଁ। ମାତ୍ର ୧୦ ଦିନ ହେବ ଆସି କାମରେ ରହିଥିବା ରଘୁବୀର ଏପରି କାଣ୍ଡ କାହିଁକି ରଚିଲା ଜାଣିବାକୁ ପୋଲିସ୍ ତାଙ୍କୁ ପଚରାଉଚରା କରୁଛି।