ଭଦ୍ରକ(ପାର୍ଥସାରଥୀ ନାୟକ): ମୁହାଁମୁହିଁ ହେଲେ ୨ କିନ୍ନର ଗୋଷ୍ଠି। ଝଗଡ଼ା ଉଗ୍ର ରୂପ ନେବାରୁ ଉଭୟ ପକ୍ଷ ମଧ୍ୟରେ ହେଲା ରକ୍ତାକ୍ତ ସଂଘର୍ଷ। କିନ୍ନରମାନଙ୍କର ହୋ ହାଲ୍ଲାରେ ଭଦ୍ରକ ଟାଉନ ଥାନା ସମ୍ମୁଖରେ ଗତକାଲି ବିଳମ୍ବିତ ରାତିରେ ସୃଷ୍ଟି ହୋଇଥିଲା ଅସ୍ୱାଭାବିକ ପରିସ୍ଥିତି।
ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଚରମ୍ପା ଅଞ୍ଚଳରେ କିନ୍ନରମାନେ ରହୁଥିବା ଅଞ୍ଚଳରେ କୌଣସି କାରଣ ପାଇଁ ଉଭୟ ଗୋଷ୍ଠୀ ମଧ୍ୟରେ ଝଗଡା ହୋଇଥିଲା। ପରେ ଏହି ଝଗଡା ଉଗ୍ର ରୂପ ନେବାରୁ, ଉଭୟ ପକ୍ଷ ମଧ୍ୟରେ ବାଡ଼ି ଠେଙ୍ଗାରେ ବାଡାବାଡ଼ି ହେବାରୁ ରକ୍ତାକ୍ତ ସଂଘର୍ଷ ହୋଇଥିଲା। ।
ପରେ ଟାଉନ ଥାନା ପୁଲିସ୍ ସୂଚନା ପାଇ ଘଟଣାସ୍ଥଳରେ ପହଞ୍ଚିଥିଲା। କିନ୍ତୁ ଘଟଣାସ୍ଥଳରେ ଉତ୍ତେଜନା ଦେଖାଦେବାରୁ ପୁଲିସ୍ ସେଠାରେ ପହଞ୍ଚି ହଟହଟା ହୋଇଥିଲା। ଏହାପରେ ପୁଲିସ୍ କିଛି କିନ୍ନରଙ୍କୁ ଥାନାକୁ ଆଣିଥିଲା ।
ପୁଲିସ୍ ବାଡ଼େଇଥିବା ଅଭିଯୋଗ କରି ଟାଉନ ଥାନା ସମ୍ମୁଖରେ କିନ୍ନରମାନେ ହଙ୍ଗାମା କରିଥିଲେ। ଏହି ସଂଘର୍ଷରେ ଆହତ ହୋଇଥିବା ଦୁଇ ଜଣ କିନ୍ନର ଭଦ୍ରକ ମେଡିକାଲରେ ଭର୍ତ୍ତି ହୋଇଛନ୍ତି। ଟାଉନ ପୋଲିସ ଘଟଣାର ଅନୁସନ୍ଧାନ ଚଳାଇଥିବା ସୂଚନା ମିଳିଛି ।