ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ ଦ୍ୱିତୀୟ ପର୍ଯ୍ୟାୟ କରୋନା ମହାମାରୀ ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ମୃତ କରୋନା ଯୋଦ୍ଧାଙ୍କ ପରିବାରକୁ ୫୦ଲକ୍ଷ ଟଙ୍କାର ଆର୍ଥିକ ସହାୟତା ଯୋଗାଇ ଦେବେ। ପ୍ରଥମ ପର୍ଯ୍ୟାୟ କରୋନା ସଂକ୍ରମଣବେଳେ ରାଜ୍ୟ ସରକାର ମୃତ କରୋନା ଯୋଦ୍ଧାଙ୍କୁ ଏହି ଆର୍ଥିକ ସହାୟତା ଦେବାକୁ ନିଷ୍ପତ୍ତି ନେଇଥିଲେ ଓ ଏବେ ପୁଣି ଥରେ କରୋନା ସଂକ୍ରମଣ ମାମଲା ବୃଦ୍ଧି ପାଉଥିବାରୁ ସରକାର ଏଭଳି ନିଷ୍ପତ୍ତି ନେଇଛନ୍ତି।
ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, କରୋନା ମୁକାବିଲାରେ ସମ୍ପୃକ୍ତ ଥିବା ବ୍ୟକ୍ତି ଅବା କର୍ମଚାରୀମାନଙ୍କର ମୃତ୍ୟୁ ହେଲେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ପ୍ୟାକେଜରେ ସେମାନଙ୍କ ପରିବାରକୁ ୫୦ଲକ୍ଷ ଟଙ୍କାର ବୀମା ରାଶି ମିଳିବ। ଆଉ ଯେଉଁ ମୃତ କରୋନା ଯୋଦ୍ଧାମାନେ ଏହି ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା ଅନ୍ତର୍ଗତ ବୀମା ରାଶି ପାଇବାକୁ ହକ୍ଦାର ହେବେନି ସେମାନଙ୍କୁ ରାଜ୍ୟ ସରକାର ନିଜ ପାଣ୍ଠିରୁ ମଧ୍ୟ ୫୦ଲକ୍ଷ ଟଙ୍କା ଲେଖାଏଁ ସହାୟତା ଦେବେ।
ରାଜ୍ୟ ସରକାରଙ୍କ ଦ୍ୱାରା ଚିହ୍ନଟ ହୋଇଥିବା କର୍ମଚାରୀମାନେ ଯଦି କୋଭିଡ୍ ମୁକାବିଲାବେଳେ ପ୍ରାଣ ହରାଇବେ ଓ ସେମାନେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାରେ ଅନ୍ତର୍ଭୁକ୍ତ ନଥିବେ ତା’ହେଲେ ସେମାନଙ୍କ ପରିବାରର ସଦସ୍ୟଙ୍କୁ ୫୦ଲକ୍ଷ ଟଙ୍କାର ଆର୍ଥିକ ସହାୟତା ଓଡ଼ିଶା ସରକାର ଯୋଗାଇ ଦେବେ। ଏଥିପାଇଁ ୨୦୨୦ ଜୁଲାଇ ୨୯ତାରିଖରେ ସ୍ୱାସ୍ଥ୍ୟ ବିଭାଗ ଜାରି କରିଥିବା ନିର୍ଦ୍ଦେଶନାମା ଅପରିବର୍ତ୍ତିତ ରହିବ ବୋଲି ସ୍ୱାସ୍ଥ୍ୟ ବିଭାଗ କହିଛି।
ସୂଚନାଯୋଗ୍ୟ, ଚଳିତ ଏପ୍ରିଲ ମାସରେ କରୋନା ମୃତ୍ୟୁ ସଂଖ୍ୟା ୧୦୮ଜଣ ପ୍ରାଣ ହରାଇଛନ୍ତି। ତେବେ ଏଥିରେ କେତେଜଣ ସରକାରୀ କର୍ମଚାରୀ ଅବା କୋଭିଡ୍ ଯୋଦ୍ଧା ଅଛନ୍ତି ତାହା ଜଣାପଡ଼ିନି ।