ଭୁବନେଶ୍ୱର(ଓଡ଼ିଶା ରିପୋର୍ଟର):କଂଗ୍ରେସ ଭବନକୁ ବାଉନସର ପଠାଇବା ବୟାନରୁ ନିଜ ସ୍ୱର ବଦଳାଇଛନ୍ତି କଂଗ୍ରେସର ବରିଷ୍ଠ ବିଧାୟକ ସୁର ରାଉତରାୟ। କଂଗ୍ରେସକୁ ବଦନାମ୍ କରିବାକୁ ଏପରି କରାଯାଇଛି । ବିଜେପି, ବିଜେଡି କେହି ବି ଏହା କରିଥାଇପାରନ୍ତି। ଏପରି କିଛି ଢଙ୍ଗରେ ବିରୋଧୀ ଦଳକୁ ଟାଗେର୍ଟ କରିଛନ୍ତି ସୁର ରାଉତରାୟ।
କଂଗ୍ରେସ ଭବନକୁ ବାଉନସର୍ କେହି ଆଣି ନାହାନ୍ତି । ଯୁବ କଂଗ୍ରେସ, ଛାତ୍ର କଂଗ୍ରେସ, ମହଳା କଂଗ୍ରେସ କିମ୍ବା ନିରଞ୍ଜନ ପଟ୍ଟନାୟକ କେହି ବି ବାଉନ୍ସର ଆଣିନାହାନ୍ତି। ଆମେ ଚାରିଆଡେ ଅନୁସନ୍ଧାନ କରି ସାରିଲୁଣି। ଏହା ବିରୋଧୀ ଦଳଙ୍କ ଷଡ଼ଯନ୍ତ୍ର। କଂଗ୍ରେସକୁ ବଦନାମ୍ କରିବାକୁ ଏହା କରାଯାଇଥାଇ ପାରେ ବୋଲି ସୁର କହିଛନ୍ତି। ବୟାନର ଦୁଇ ଦିନ ପରେ ନିଜ ମନ୍ତବ୍ୟକୁ ବଦଳାଇଛନ୍ତି ସୁର।
ସେ କହିଥିଲେ ‘ ଆରେ, କଂଗ୍ରେସର ଲୋକ ଅଭାବ ? ଆମେ ଡାକିଦେଲେ ୫୦୦୦ ଠିଆହେବେ। ଆଉ ଏଇ ୪/୫ଟା ଗୁଣ୍ଡା ଆସି ଆମକୁ ସଂଶୋଧନ କରିବେ ? ଆମକୁ କଣ୍ଟ୍ରୋଲ କରିବେ ?‘
ଏଠି କହିରଖିବୁ, ଗତ ୧୮ ତାରିଖ ଏଇ ଘଟଣାକୁ ନେଇ ପ୍ରତିକ୍ରିୟା ରଖି ସୁର କହିଥିଲେ ଯେ, କଂଗ୍ରେସ ଭବନରେ ଯାହା କିଛି ହେଲା ଠିକ୍ ନୁହେଁ। ଦଳରେ ଗୁଣ୍ଡା ଶାସନ ଚାଲିବନି। ହେଲେ ଏବେ ନିଜ ମନ୍ତବ୍ୟ ସିଏ କାହିଁକି ବଦଳାଇଲେ ତାକୁ ନେଇ ଚର୍ଚ୍ଚା ଜୋର ଧରିଛି। ଅନ୍ୟପଟେ ସୁରଙ୍କ ଅଭିଯୋଗ ନେଇ ବିଜେପି ଓ ବିଜେଡିର ପ୍ରତିକ୍ରିୟା ମିଳିପାରିନି।
ସୂଚନାଥାଉ କି, ୨୦୧୯ ସାଧାରଣ ନିର୍ବାଚନରେ ରାଜ୍ୟରେ କଂଗ୍ରେସ ଶୋଚନୀୟ ପରାଜୟ ବରଣ କରିବା ପରେ ଏହାର କାରଣ ଖୋଜିବା ପାଇଁ ଗତ ଶୁକ୍ରବାର କଂଗ୍ରେସ ଭବନରେ ମାନସମନ୍ଥନ ଚାଲିଥିଲା। ଆଉ ଏହି ସମୟରେ କଂଗ୍ରେସ ଭବନରେ ବାଉନ୍ସର ମୁତୟନ ହୋଇଥିବା ଚର୍ଚ୍ଚା ଲାଗି ରହିଥିଲା। ଏହାକୁ ନେଇ କଂଗ୍ରେସର ବରିଷ୍ଠ ନେତା ଶରତ ରାଉତ ବର୍ଷିଥିଲେ । କଂଗ୍ରେସ ଭବନରେ ବିଜେଡି କିମ୍ୱା ବିଜେପି ବାଉନ୍ସର ମୁତୟନ କରିଥାଇ ପାରନ୍ତି ବୋଲି ସେ କହିଛନ୍ତି।