ଆଠଗଡ଼(ନୀଳକଣ୍ଠ ଦୋରା): ଆଠଗଡ଼ର ମୁଣ୍ଡଳି ବ୍ରିଜରୁ ମହାନଦୀକୁ ଆଜି ସକାଳେ ଡେଇଁ ପଡ଼ିଥିବା ଯୁବକଙ୍କ ପତ୍ତା ମିଳି ନ ଥିବା ବେଳେ ମିଳିଛି ତାଙ୍କ ପରିଚୟ । ଗାଡ଼ିରୁ ଡିଏଲ୍ ଓ ପାନ୍ କାର୍ଡ ବାହାର କରିବା ପରେ ସ୍ପଷ୍ଟ ହୋଇଛି ତାଙ୍କ ପରିଚୟ। ଯୁବକଙ୍କ ନାଁ ବିଶ୍ୱଦେବ ଦାସ। ତାଙ୍କ ଘର ଭୁବନେଶ୍ୱର ଚନ୍ଦ୍ରଶେଖରପୁର ଅଞ୍ଚଳରେ ବୋଲି ଜଣାଯାଇଛି। ତାଙ୍କୁ ଖୋଜାଖୋଜି କରିବାକୁ ଅଗ୍ନିଶମ କର୍ମଚାରୀ ପ୍ରଚେଷ୍ଠା ଚଳାଇଛନ୍ତି।
ଆଜି ସକାଳେ ମୁଣ୍ଡଳି ବ୍ରିଜ୍ ଉପରେ ଯୁବକ ଜଣକ ସ୍କୁଟି ରଖି ହଠାତ୍ ନଦୀକୁ ଡେଇଁ ପ଼ଡ଼ିଥିଲେ। କିଛି ସ୍ଥାନୀୟ ଲୋକ ଏହା ଦେଖି ପୁଲିସ୍ ଓ ଅଗ୍ନିଶମ କର୍ମଚାରୀଙ୍କୁ ଖବର ଦେଇଥିଲେ। ନଦୀର ପ୍ରଖର ସ୍ରୋତରେ ଯୁବକ ଜଣଙ୍କ ଭାସି ଯାଇଛନ୍ତି । ବାରଙ୍ଗ ଓ ଆଠଗଡ଼ରୁ ମିଳିତ ଭାବେ ଦମକଳ ବାହିନୀ ଆସି ଯୁବକଙ୍କୁ ଠାବ କରିବାକୁ ଉଦ୍ୟମ ଚଳାଇଛନ୍ତି ।
ତାଙ୍କ ପରିଚୟ ସ୍ପଷ୍ଟ ହେବା ପରେ ପୁଲିସ୍ ତାଙ୍କ ପରିବାର ସହ ଯୋଗାଯୋଗ କରିବାକୁ ଚେଷ୍ଟା ଚଳାଇଛି। ହେଲେ କ’ଣ ପାଇଁ ଏପରି ଚରମ ପଦକ୍ଷେପ ନେଇଛନ୍ତି, ସେ ନେଇ କିଛି ସୂଚନା ମିଳିନି।