୩ ଲୁଟେରା ଗିରଫ: ୯ଟି ସୁନା ଚେନ୍‌ ଓ ୭ ବାଇକ୍ ଜବତ

ଖୋର୍ଦ୍ଧା (ଓଡ଼ିଶା ରିପୋର୍ଟର): ସୁନା ଚେନ୍‌ ଲୁଟୁଥିଲେ। ଘରୋଇ ବ୍ୟାଙ୍କରେ ବନ୍ଧା ରଖୁଥିଲେ। ଏଭଳି ଏକ ଲୁଟେରା ଗ୍ୟାଙ୍ଗର ୩ ସଦସ୍ୟଙ୍କୁ ଗିରଫ କରିଛି ଖୋର୍ଦ୍ଧା ଟାଉନ ଥାନା ପୁଲିସ୍।

ଅଭିଯୁକ୍ତମାନେ ହେଉଛନ୍ତି କାଳି ପ୍ରସାଦ ରାଉଳ, ସୁନୀଲ ମାନସିଂହ ଓ ବିଭୁତିଭୂଷଣ ସାହୁ। କାଳି ପ୍ରସାଦର ଘର ଗଡ଼ଖୋର୍ଦ୍ଧା ହାଉସିଂବୋର୍ଡ କଲୋନୀରେ ହୋଇଥିବା ବେଳେ ସୁନୀଲ ବାଜପୁରର ବାସିନ୍ଦା। ସେହିପରି ବିଭୁତିଭୂଷଣର ଘର ପୁରୀ ଜିଲ୍ଲା ଗଡ଼ିଶଗଦା ଗାଁରେ।

ଅଭିଯୁକ୍ତମାନେ କେବଳ ସୁନା ଚେନ୍ ଲୁଟୁ ନ ଥିଲେ ବାଇକ୍ ମଧ୍ୟ ଚୋରି କରୁଥିଲେ। ସେମାନଙ୍କ ଠାରୁ ୯ଟି ସୁନା ଚେନ୍ ଓ ୭ଟି ଚୋରା ବାଇକ୍‌ ମଧ୍ୟ ଜବତ କରାଯାଇଛି।

ଖୋର୍ଦ୍ଧା ସହର ସମେତ ଜଟଣୀ ଓ ଭୁବନେଶ୍ୱରରୁ ସୁନା ଚେନ ଲୁଟ୍‌ କରି ଅଭିଯୁକ୍ତମାନେ ଭିନ୍ନ ଭିନ୍ନ ଘରୋଇ ବ୍ୟାଙ୍କରେ ବନ୍ଧା ରଖିବା ସମ୍ପର୍କରେ କୌଣସି ସୂତ୍ରରୁ ଖବର ପାଇଥିଲା ଟାଉନ ଥାନା ପୁଲିସ। ଏହା ପରେ ଚଢ଼ାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲା।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।