ଭୁବନେଶ୍ୱର: ଆଗାମୀ ୩ବର୍ଷ ଭିତରେ ରାଜ୍ୟରେ ନିର୍ମାଣ ହେବ ୧୧୨ଟି ଶୀତଳଭଣ୍ଡାର। ଉତ୍ପାଦିତ ଆଳୁର ସଂରକ୍ଷଣ ପାଇଁ ଶୀତଳଭଣ୍ଡାର କାର୍ଯ୍ୟର ଅଗ୍ରଗତି ସମ୍ପର୍କରେ ମୁଖ୍ୟମନ୍ତ୍ରୀଙ୍କ ଦ୍ୱାରା ସଚିବାଳୟରେ ଅନୁଷ୍ଠିତ ସମୀକ୍ଷା ବୈଠକରେ ଏହି ନିଷ୍ପତ୍ତି ହୋଇଛି। ୭ଲକ୍ଷ ୫ ହଜାର ମେଟ୍ରିକ ଟନ୍ କ୍ଷମତା ବିଶିଷ୍ଟ ୧୧୨ଟି ଶୀତଳ ଭଣ୍ଡାର ମୁଖ୍ୟତଃ ଘରୋଇ ଉଦ୍ୟମରେ ନିର୍ମାଣ ହେବ। ଏଥିପାଇଁ ବର୍ତ୍ତମାନ ସୁଦ୍ଧା ୬୩ଟି ଆବେଦନ ମଧ୍ୟରୁ ୪୧ଜଣ ଉଦ୍ୟୋଗୀଙ୍କୁ ମନୋନୀତ କରାଯାଇଛି। ଶୀତଳଭଣ୍ଡାର ଗୁଡ଼ିକରେ ବିଦ୍ୟୁତ୍ ଶୁଳ୍କରେ ରିହାତି ଦେବାକୁ ସ୍ଥିର ହୋଇଛି। ନୂଆ ଶୀତଳଭଣ୍ଡାର ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିବା ଲାଗି କୃଷି, ସମବାୟ, ଖାଦ୍ୟ ଓ ଯୋଗାଣ ଏବଂ ଶକ୍ତି ବିଭାଗ ପରସ୍ପର ସମନ୍ୱୟ ରକ୍ଷା କରି କାର୍ଯ୍ୟ କରିବାକୁ ମୁଖ୍ୟମନ୍ତ୍ରୀ ସମୀକ୍ଷା ବୈଠକରେ ପରାମର୍ଶ ଦେଇଛନ୍ତି। ୨୦୧୮ ସୁଦ୍ଧା ରାଜ୍ୟରେ ୬୦ ହଜାର ହେକ୍ଟର ଜମିରେ ଉଭୟ ଖରିଫ ଓ ରବି ଋତୁରେ ଆଳୁ ଉତ୍ପାଦନ ୧୧ଲକ୍ଷ ୨୫ ହଜାର ମେଟ୍ରିକ୍ ଟନକୁ ପହଞ୍ଚାଇବାକୁ ମଧ୍ୟ ଲକ୍ଷ୍ୟ ରଖାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
