ପୁରୀ (ଓଡ଼ିଶା ରିପୋର୍ଟର): ଆସନ୍ତାକାଲି ସକାଳେ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରିବେ ରାଷ୍ଟ୍ରପତି ରାମନାଥ କୋବିନ୍ଦ। ଏଥିପାଇଁ ଶ୍ରୀମନ୍ଦିରରେ ଦୁଇ ଘଣ୍ଟା ସାଧାରଣ ଦର୍ଶନ ବନ୍ଦ ରହିବ। ଆସନ୍ତାକାଲି ସକାଳ ୬ଟା ୩୦ରୁ ୮ଟା ୩୦ ପର୍ଯ୍ୟନ୍ତ ସର୍ବସାଧାରଣ ଦର୍ଶନ ବନ୍ଦ ରହିବ। ରାଷ୍ଟ୍ରପତି ସକାଳ ୭ଟା ୩୦ରୁ ୮ଟା ୧୫ ପର୍ଯ୍ୟନ୍ତ ଶ୍ରୀଜିଉଙ୍କୁ ଦର୍ଶନ କରିବାର କାର୍ଯ୍ୟକ୍ରମ ରହିଛି।
କଟକରେ ସମସ୍ତ କାର୍ଯ୍ୟକ୍ରମ ସରିବା ପରେ ରାଷ୍ଟ୍ରପତି ପୁରୀ ଅଭିମୁଖେ ଯାତ୍ରା କରିଛନ୍ତି। ପୁରୀ ତାଳବଣୀଆ ହେଲିପେଡ୍ରେ ରାଷ୍ଟ୍ରପତିଙ୍କ ବିମାନ ପହଞ୍ଚିବା ଜିଲ୍ଲା ପ୍ରଶାସନ ପକ୍ଷରୁ ଭବ୍ୟ ସ୍ୱାଗତ କରାଯାଇଥିଲା। ପରେ ରାଷ୍ଟ୍ରପତିଙ୍କୁ ସର୍କିଟ ହାଉସକୁ ପାଛୋଟି ନିଆଯାଇଥିଲା। ଆଜି ରାତିରେ ସେଠାରେ ସେ ରାତ୍ରୀ ଯାପନ କରିଥିଲେ। ଆସନ୍ତାକାଲି ସକାଳେ ସେ ଶ୍ରୀଜିଉଙ୍କୁ ଦର୍ଶନ କରିବେ। ସକାଳେ ସାଢ଼େ ୭ଟାରେ ରାଷ୍ଟ୍ରପତି ଶ୍ରୀମନ୍ଦିର ଯାଇ ପ୍ରାୟ ୪୫ ମିନିଟ ବେଢ଼ା ପରିକ୍ରମା ଓ ଗର୍ଭଗୃହକୁ ଯାଇ ଶ୍ରୀଜିଉଙ୍କୁ ଦର୍ଶନ କରିବାର କାର୍ଯ୍ୟକ୍ରମ ରହିଛି। ପରେ ପୁରୀରେ ରାଷ୍ଟ୍ରୀୟ ସଂସ୍କୃତ ସଂସ୍ଥାନର ଶତବାର୍ଷିକୀ ଉତ୍ସବରେ ଯୋଗଦେବେ ରାମନାଥ କୋବିନ୍ଦ। ଏଠାରେ ସେ ଦିନ ୧୦ଟାରୁ ୧୦ଟା ୪୫ ମିନିଟ ପର୍ଯ୍ୟନ୍ତ ରହିବେ। ପୁରୀରୁ ପୁଣି ଭୁବନେଶ୍ୱର ଆସି ଅରୁଗୁଳସ୍ଥିତ ଆଇଆଇଟିର ସମାବର୍ତ୍ତନ ଉତ୍ସବରେ ଦୀକ୍ଷାନ୍ତ ଭାଷଣ ଦେବେ ରାଷ୍ଟ୍ରପତି। ପରେ ରାଜନଧାନୀର ICT IOC କ୍ୟାମ୍ପସ୍ ଓ ସ୍କିଲ ଡେଭଲପମେଣ୍ଟ ଇନଷ୍ଟିଚ୍ୟୁଟର ଭିତ୍ତିପ୍ରସ୍ତର ସ୍ଥାପନ କରିବେ। ଅପରାହ୍ଣ ୫ଟା ୩୦ରେ ସେ ଭୁବନେଶ୍ୱର ବିମାନବନ୍ଦ ଛାଡ଼ିବାର କାର୍ଯ୍ୟକ୍ରମ ରହିଛି।