ଢେଙ୍କାନାଳ(ରାଜଶ୍ରୀ ଶତପଥୀ): ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ କାଲୁରିଆ ବ୍ରାହ୍ମଣୀ ନଦୀଘାଟ ନିକଟରେ ଘଟିଛି ଏକ ମର୍ମନ୍ତୁଦ ଦୁର୍ଘଟଣା । କାଲୁରିଆଠାରେ ଚାଲିଥିବା ଏକ ବେଆଇନ ବାଲି ଘାଟରୁ ଏକ ଚୋରା ବାଲି ବୋଝେଇ ଟ୍ରାକ୍ଟର ଓଲଟି ପଡିବାରୁ ଘଟଣାସ୍ଥଳରେ ୨ଜଣଙ୍କର ମୃତ୍ୟୁ ଘଟିଥିବାବେଳେ ଜଣେ ଗୁରୁତର ହୋଇଛନ୍ତି ।
ମୃତକ ହେଲେ କାଲୁରିଆ ଗ୍ରାମର ନରୋତ୍ତମ ବେହେରା ଓ ରାଜୀବ ବେହେରା । ଅପରପକ୍ଷରେ ଗୁରୁତରଜଣଙ୍କ ଶ୍ରୀକାନ୍ତ ସାହୁ ବୋଲି ଜଣାପଡିଛି । ଗତକାଲି ବିଳମ୍ବିତ ରାତ୍ରିରେ ବାଲି ଚୋରା ଚାଲାଣ କରୁଥିବାବେଳେ ଏହି ଟ୍ରାକ୍ଟରଟି ଓଲଟି ଏହି ତିନିଜଣଙ୍କ ଉପରେ ପଡ଼ି ଯାଇଥିଲା । ଫଳରେ ଗ୍ରାମବାସୀ ଚିକିତ୍ସା ପାଇଁ ୩ଜଣଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ମାତ୍ର ଦୁଇ ଜଣଙ୍କର ମୃତ୍ୟୁ ଘଟିଥିବା ବେକେ ଶ୍ରୀକାନ୍ତ ସାହୁଙ୍କ ଅବସ୍ଥା ଗୁରୁତର ରହିଛି ।
ବେଆଇନ ଭାବେ ଚାଲୁଥିବା ଏହି ବାଲି ଘାଟରୁ ରାତିରେ ବାଲି ଚୋରା ଚାଲାଣ କରାଯାଉଥିବାରୁ ଏପରି ଅଘଟଣ ଘଟିଥିବା ଜଣାପଡିଛି । ପୁଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି ।