ବରଗଡ଼(ଦୀପକ ଶର୍ମା): ବରଗଡ଼ଠାରେ କ୍ୟାନସର ହସ୍ପିଟାଲ୍ ପ୍ରତିଷ୍ଠା ପାଇଁ ଦାବି ଜୋର ଧରିଲା। ଏହି ପରିପ୍ରେକ୍ଷୀରେ ଆଜି ବରଗଡ଼ ଦେଇ ଯାଇଥିବା ୫୩ ନମ୍ୱର ଜାତୀୟ ରାଜପଥର ବରାହଗୋଡ଼ା ଟୋଲ୍ ପ୍ଲାଜାଠାରେ ପଞ୍ଚ ଘଣ୍ଟା ଧରି ରାସ୍ତା ଅବରୋଧ କରିଥିଲା ୟୁନାଇଟେଡ୍ ଫୋରମ୍। ଏଥିରେ ଜିଲ୍ଲାର ବିଭିନ୍ନ ସଂଗଠନ ସମେତ ରାଜନୀତିକ ଦଳ ସାମିଲ୍ ହୋଇଥିଲେ।
ପରିସଂଖ୍ୟାନରୁ ଜଣାପଡ଼ିଛି, ସମଗ୍ର ଭାରତ ବର୍ଷରେ କ୍ୟାନସର ରୋଗୀଙ୍କ ସଂଖ୍ୟାରେ ଦ୍ଵିତୀୟ ସ୍ଥାନରେ ରହିଛି ବରଗଡ଼ ଜିଲ୍ଲା। ତେଣୁ ଏଠାରେ ଏକ କ୍ୟାନସର ରୋଗର ଚିକିତ୍ସା ଓ ନିରାକରଣ ପାଇଁ ଦାବି ହେଉଥିଲା। ସ୍ଥାନୀୟ ଲୋକଙ୍କ ଦାବିକୁ ଧ୍ୟାନ ଦେଇ ରାଜ୍ୟ ସରକାର ସେଠାରେ ଏକ କ୍ୟାନସର ହସ୍ପିଟାଲ୍ ପ୍ରତିଷ୍ଠା ପାଇଁ ଟାଟା ମେମୋରିଆଲ୍ ସହ ଚୁକ୍ତି କରିଛନ୍ତି। ପରବର୍ତ୍ତୀ ସମୟରେ ରାଜ୍ୟ ସରକାର ବରଗଡ଼ରେ ଟାଟା ମେମୋରିଆଲ୍ ହସ୍ପିଟାଲ୍ ପ୍ରତିଷ୍ଠା ନକରି ଭୁବନେଶ୍ୱର ଉପକଣ୍ଠରେ ପ୍ରତିଷ୍ଠା ପାଇଁ ସମ୍ମତି ଦେଇଥିବା ଜଣାପଡ଼ିଛି। ଏହାକୁ ନେଇ ସମଗ୍ର ଜିଲ୍ଲାରେ ଜନଅସନ୍ତୋଷ ପ୍ରକାଶ ପାଇଛି। ଏହାର ପ୍ରତିବାଦରେ ଆଜି ଚକାବନ୍ଦ ଆନ୍ଦୋଳନ କରାଯାଇଥିଲା।