କଟକ(ଓଡ଼ିଶା ରିପୋର୍ଟ): ଭାରସାମ୍ୟ ହରାଇ ୫ଟି ବାଇକ୍ ଓ ୨ଟି କାର୍ ଉପରେ ମାଡ଼ିଗଲା ଟ୍ରକ୍। କଟକ ଜିଲ୍ଲା ଜଗତପୁର ଖଇରା ପୋଲ ନିକଟରେ ଆଜି ସନ୍ଧ୍ୟାରେ ଘଟିଛି ଏହି ଦୁର୍ଘଟଣା। ଦୁର୍ଘଟଣାରେ ୬ ଜଣ ଆହତ ହୋଇଥିବା ବେଳେ ଜଣଙ୍କ ମୃତ୍ୟୁ ହୋଇଛି। ମୃତକ ହେଲେ ଫଳ ଦୋକାନୀ ସୁବାସ ସାହୁ। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ଦେଖାଦେଇଛି।
ସୂଚନା ମୁତାବକ, ସାଲେପୁର-ଖଇରା ରାସ୍ତାର ଜନଗହଳି ପୂର୍ଣ୍ଣ ଖଇରା ପୋଲ ନିକଟରେ ଗାଡ଼ିଗୁଡ଼ିକ ଥୋଇ ଲୋକେ ଏଠାରେ ଥିବା ଫଳ ଦୋକାନରୁ ଫଳ କିଣୁଥିଲେ। ଏହି ସମୟରେ ଗୋଟିଏ ଟ୍ରକ୍ ଦୃତଗତିରେ ଆସି ରାସ୍ତା ପାର୍ଶ୍ୱରେ ରହିଥିବା ବାଇକ୍ ଓ କାରଗୁଡ଼ିକୁ ଧକ୍କା ଦେଇଥିଲା। ଫଳରେ ଏହି ଗାଡ଼ିଗୁଡ଼ିକ ଫଳ ଦୋକାନ ଭିତରେ ପଶି ଯାଇଥିଲା। ଟ୍ରକ୍ଟି ମଧ୍ୟ ଫଳ ଦୋକାନରେ ମାଡ଼ ହୋଇଥିଲା।
ଏହି ସମୟରେ ବାଇକ୍ ଧରି ଠିଆ ହୋଇଥିବା, କାର ଭିତରେ ଥିବା ଲୋକେ, ଫଳ କିଣୁଥିବା ବହୁ ଗ୍ରାହକ ଓ ଦୋକାନୀମାନେ ଆହତ ହୋଇଥିଲେ। ଖବର ପାଇ ଜଗତପୁର ଥାନା ପୁଲିସ ଘଟଣା ସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିବା ସହ ଲୋକଙ୍କୁ ବୁଝାସୁଝା କରିଛି। ଆହତମାନଙ୍କୁ ଆମ୍ବୁଲାନ୍ସ ଓ ପୁଲିସ ଗାଡ଼ି ଯୋଗେ କଟକ ବଡ ମେଡିକାଲକୁ ପଠାଇ ଦିଆଯାଇଛି। ସେପଟେ ଟ୍ରକ୍ ଧକ୍କା କରିବା ପରେ ଏହା ଡ୍ରାଇଭର ଫେରାର ହୋଇଯାଇଛି।