ଉମରକୋଟ(କାର୍ତ୍ତିକ ମଲ୍ଲିକ): ଲଗାଣ ବର୍ଷାରେ ଭୁଶୁଡ଼ି ପଡ଼ିଲା ଘରର କାନ୍ଥ। କାନ୍ଥ ତଳେ ଚାପି ହୋଇ ଚାଲିଯାଇଛି ୯ ବର୍ଷିୟ ଶିଶୁପୁତ୍ରର ଜୀବନ। ଆଜି ସକାଳେ ଏହି ଘଟଣା ଘଟିଛି। ମୃତକ ଜଣକ ନବରଙ୍ଗପୁର ଜିଲ୍ଲା ରାଇଘର ବ୍ଲକ୍ ଅନ୍ତର୍ଗତ କୁବଢାଡିହି ଗ୍ରାମର ପାଲା ଗଣ୍ଡଙ୍କ ପୁଅ ଆକାଶ ଗଣ୍ଡ। ତେବେ ଏହି ଘଟଣାରେ ପରିବାର ଅନ୍ୟମାନେ ଅଳ୍ପକେ ବର୍ତ୍ତି ଯାଇଛନ୍ତି।
ସୂଚନା ମୁତାବକ, ଏହି ଅଞ୍ଚଳରେ କିଛି ଦିନ ଧରି ବର୍ଷା ଲାଗି ରହିଛି। ଅଭାବି ଓ ଦାରିଦ୍ରତା ଭିତରେ ପାଲାଙ୍କ ପରିବାର ଏକ ଛୋଟିଆ ଘରେ ବସବାସ କରୁଥିଲେ। ବର୍ଷା ମାଡ଼ରେ ଘରର କାନ୍ଥ ଦୁର୍ବଳ ହୋଇପଡ଼ିଥିଲା। ଗତକାଲି ରାତିରେ ପରିବାର ଲୋକେ ଖାଇପିଇ ଏହି ଘରେ ଶୋଇଥିଲେ। ଆଜି ଭୋର ସମୟରେ ହଠାତ୍ ଘରର କାନ୍ଥଟି ଭୁଶୁଡ଼ି ପଡ଼ିଥିଲା। ଯାହା ଘରେ ଶୋଇଥିବା ସମସ୍ତଙ୍କ ଉପରେ ପଡ଼ିଯାଇଥିଲା। ହେଲେ ଦୁର୍ଭାଗ୍ୟକୁ ଏହି ଦୁର୍ଘଟଣାରେ ଶିଶୁର ଜୀବନ ଚାଲିଯାଇଥିଲା। ଅନ୍ୟମାନେ ଅଳ୍ପକେ ବର୍ତ୍ତି ଯାଇଛନ୍ତି।
ଘଟଣା ସ୍ଥଳରେ ରାଇଘର ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ଏହି ଦୁଃଖଦ ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।