ଦର କମିବ, ନା ଫାଇଦା ନେବେ ବ୍ୟବସାୟୀ ?

ଭୁବନେଶ୍ୱର(ଓଡ଼ିଶା ରିପୋର୍ଟର) ଡାଲି, ଆଳୁ, ପିଆଜ ଓ ତୈଳବୀଜ ସାମଗ୍ରୀ ନିୟନ୍ତ୍ରଣ ମୁକ୍ତ ହେବା ପରେ କାହାର ହେବ ଲାଭ ? ଦର କମିବ, ନା ଫାଇଦା ନେବେ ବ୍ୟବସାୟୀ ? ସଂସଦରେ ଏସେନସିଆଲ କମୋଡିଟିଜ୍ ଆମେଣ୍ଡମେଣ୍ଟ ବିଲ୍ ପାରିତ ହେବା ପରେ ଆରମ୍ଭ ହୋଇଛି ବିତର୍କ । ଏଣେ ଏହି ପ୍ରସଙ୍ଗକୁ ନେଇ ଜୋର ଧରିଛି ରାଜନୀତି । କଂଗ୍ରେସ ଏହାକୁ ପୁଞ୍ଜିପତିଙ୍କ ପାଇଁ ବିଲ୍ କହିଥିବା ବେଳେ ବିଜେଡି ମାପିଚୁପି ମତ ରଖିଛି।

ସରକାରଙ୍କ ଯୁକ୍ତି ନୂଆ ନିୟମ ଦ୍ୱାରା କୃଷି କ୍ଷେତ୍ରକୁ ପ୍ରତ୍ୟେକ୍ଷ ବିଦେଶୀ ପୁଞ୍ଜି ଆସିବ, ଏସବୁ ସାମଗ୍ରୀର କାରବାରରେ ସରକାରୀ ନିୟନ୍ତ୍ରଣ ହଟିବା ସହ ପୁଞ୍ଜିନିବେଶକାରୀଙ୍କ ମନରେ ଥିବା ଶଙ୍କା ଦୂର ହେବ। ଶୀତଳ ଭଣ୍ଡାର ଭଳି କୃଷି ଭିତ୍ତିଭୂମି ବିକାଶ ଓ ଖାଦ୍ୟ ଯୋଗାଣ ବ୍ୟବସ୍ଥାରେ ସୁଧାର ଆସିବ। ଯୋଗାଣ ନିୟନ୍ତ୍ରିତ ହେବା ସହ ଅଣଉତ୍ପାଦନ ଋତୁରେ ବି ଦରରେ ସନ୍ତୁଳନ ରହିବ। ତେବେ ଏସବୁ ସାମଗ୍ରୀ ମହଜୂଦ ରଖିବାର ସୀମା ହଟାଇ ଦିଆଯିବା ଦ୍ୱାରା ଦର ନିୟନ୍ତ୍ରଣ କ୍ଷମତା ବଡ଼ ବ୍ୟବସାୟୀଙ୍କ ହାତକୁ ଚାଲିଯିବ ବୋଲି ଆଶଙ୍କା କରାଯାଉଛି।

ଏପଟେ ଅତ୍ୟାବଶ୍ୟକ ସାମଗ୍ରୀକୁ ନିୟନ୍ତ୍ରଣ ମୁକ୍ତ କରାଯିବାକୁ ନେଇ ତେଜିଛି ରାଜନୀତି । ରାଜ୍ୟ କଂଗ୍ରେସ କହିଛି ପୁଞ୍ଜିପତିଙ୍କୁ ସୁହାଇଲା ଭଳି ଆଇନ ଆଣିଛନ୍ତି କେନ୍ଦ୍ର ସରକାର।  ଅନ୍ୟପଟେ ବିଜେଡି କହିଛି ଏହା କେନ୍ଦ୍ର ସରକାରଙ୍କ ପଲିସି ଡିସିସନ । ଓଡ଼ିଶା ଉପରେ ଏହାର କଣ ପ୍ରଭାବ ପଡ଼ିବ ତାର ଅନୁଧ୍ୟାନ କରାଯିବ। ତେବେ କେନ୍ଦ୍ରର ନିଷ୍ପତ୍ତି ଚାଷୀ, ବ୍ୟବସାୟୀ ଓ ଖାଉଟୀ ସମସ୍ତଙ୍କ ପାଇଁ ଲାଭଦାୟକ ହେବ ବୋଲି ବିଜେପି ମତ ରଖିଛି ।

ନୂଆ କୃଷି ବିଲ୍ ଅନୁସାରେ ଯୁଦ୍ଧ ଭଳି ବିଶେଷ ପରିସ୍ଥିତିକୁ ଛାଡିଲେ ଡାଲି, ଆଳୁ, ପିଆଜ ଓ ତୈଳବୀଜ ଆଦି ମହଜୁଦ ରଖିବାର ସର୍ବୋଚ୍ଚ ସୀମା ରହିବ ନାହିଁ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।