ବିଜେଡି ପାଇଁ ମହଙ୍ଗା ପଡିବ କି ବୈଜୟନ୍ତଙ୍କ ଇସ୍ତଫା ? କ’ଣ କହିଲେ ସୂର୍ଯ୍ୟପାତ୍ର  

ଭୁବନେଶ୍ୱର (ଓଡ଼ିଶା ରିପୋର୍ଟର): ବିଜେଡି ପାଇଁ ମହଙ୍ଗା ପଡିବ କି ବୈଜୟନ୍ତଙ୍କ ଇସ୍ତଫା ? ଦଳରେ କୋଣଠେସା ହୋଇ ରହିଥିବା ଅନ୍ୟ ନେତାମାନେ  ବୈଜୟନ୍ତଙ୍କ ରାସ୍ତାରେ ଯିବେନି ତ? ରାଜନୈତିକ ମହଲରେ ଏବେ ଏଭଳି କିଛି କଳ୍ପନାଜଳ୍ପନା ଚାଲିଛି।  ପୂର୍ବରୁ ଦଳ ପରିଚାଳନା ଓ ପାଣ୍ଡିୟାନଙ୍କ ମାତ୍ରାଧିକ ହସ୍ତକ୍ଷେପକୁ  ନେଇ ଅସନ୍ତୁଷ୍ଟ କିଛି ନେତା ଦଳ ଛାଡ଼ିବା ପରେ ଏବେ ବୈଜୟନ୍ତଙ୍କ ଇସ୍ତଫା ଏହି ଚର୍ଚ୍ଚାକୁ ଖୋରାକ୍ ଯୋଗାଇଛି।  ନିଆଁରେ ଘିଅ ଢାଳିବା ପରି କଂଗ୍ରେସ କହିଛି, ନବୀନଙ୍କୁ ଷଡ଼ଯନ୍ତ୍ରକାରୀ ଘେରି ରହିଛନ୍ତି, ତାକୁ ସେ ବୁଝିପାରୁ ନାହିଁନ୍ତି । ତେବେ ବିଜେଡିର ବରିଷ୍ଠ ମନ୍ତ୍ରୀ ସୂର୍ଯ୍ୟ ପାତ୍ର କହିଛନ୍ତି ବୈଜୟନ୍ତଙ୍କ ଯିବା କିଛି ପ୍ରଭାବ ପକାଇବନି ।

ରାଜ୍ୟ ରାଜନୀତିରେ ହଲଚଲ୍

ବୈଜୟନ୍ତଙ୍କ ଇସ୍ତାଫା ନେଇ ରାଜ୍ୟ ରାଜନୀତିରେ ହଲଚଲ୍। ଭୁବନେଶ୍ୱରୁ ଦିଲ୍ଲୀ ଯାଏଁ ଚର୍ଚ୍ଚା। ବିଜେଡିରେ ବି  ଚାପା ଗୁଞ୍ଜରଣ ବୈଜୟନ୍ତଙ୍କ ଇସ୍ତାଫା ବିଜେଡି ଉପରେ କି ପ୍ରଭାବ ପକାଇବ? ବୈଜୟନ୍ତଙ୍କ ସଂସଦୀୟ କ୍ଷେତ୍ର କେନ୍ଦ୍ରାପଡ଼ା, ଓଡ଼ିଶା ଓ ଦିଲ୍ଲୀରେ ବି ଏହାର ପ୍ରତିକୂଳ ପ୍ରଭାବ ପଡ଼ିବ କି? ବିଜୁ ପଟ୍ଟନାୟକଙ୍କ ପରିବାର ସହ ଘନିଷ୍ଠ ସଂପର୍କ ଓ ବିଜେଡି ଗଠନ ହେବାଠାରୁ ଦଳ ସହ ଓତଃପ୍ରୋତ ଭାବେ ଜଡ଼ିତ ବୈଜୟନ୍ତ ଦଳ ଛାଡିବା ପରେ ଦଳ ପାଇଁ କିଛି ଅଡ଼ୁଆ  ସୃଷ୍ଟି ହେବ କି? ଦିଲ୍ଲୀରେ ବୈଜୟନ୍ତଙ୍କର ବେଶ୍ କାଟ୍‌ତି ଥିବାବେଳେ ଯେଉଁ ଷଡଯନ୍ତ୍ରର ଅଭିଯୋଗ ଆଣି ଦଳ ଛାଡିଛନ୍ତି ତା’ର ପ୍ରଭାବ ଦିଲ୍ଲୀ ରାଜନୀତିକୁ ବି  ପ୍ରଭାବିତ କରିପାରେ।  ତାଙ୍କ ରାସ୍ତାରେ ଅନ୍ୟ କିଛି ଅସନ୍ତୁଷ୍ଟ ନେତା ଯିବେ କି ତାକୁ ନେଇ ବି ଚର୍ଚ୍ଚା ଲାଗି ରହିଛି । କିଛିମାସ ତଳେ ବିଜେଡି ଛାଡିଥିବା ଜୟରାମ ପାଙ୍ଗୀ ଓ ରମାରଂଜନ ବଳିଆରସିଂ ଏନେଇ ପ୍ରତିକ୍ରିୟା ରଖିଥିବା ବେଳେ ପାଦେ ଆଗକୁ ଯାଇ ବରିଷ୍ଠ କଂଗ୍ରେସ୍ ନେତା ସୁର ରାଉତରାୟ କହିଛନ୍ତି ନବୀନଙ୍କୁ ଚାରିପଟୁ ଷଡଯନ୍ତ୍ରକାରୀ ଘେରି ରହିଛନ୍ତି। ଏହାକୁ ସେ ବୁଝିପାରୁ ନାହାନ୍ତି।

ବିଜେଡିରେ ବଢୁଛି ଅନ୍ତଃର୍ଦ୍ୱନ୍ଦ୍ୱ

ସେପଟେ ବିଜେଡିରେ ବଢ଼ିବାରେ ଲାଗିଛି ଅନ୍ତର୍ଦ୍ୱନ୍ଦ୍ୱ । ଯାହାର ଜ୍ୱଳନ୍ତ ଉଦାହରଣ ହେଉଛି ମହାନଦୀ ସୁରକ୍ଷା ଅଭିଯାନ। ଏହି ମହାନଦୀ ସୁରକ୍ଷା ଅଭିଯାନ ଚାଲିଥିବା ବେଳେ ଦଶପଲ୍ଲାରେ ବିଧାୟକ ଓ ବିଧାୟକ ବିରୋଧୀ ଗୋଷ୍ଠୀ ମୁହାଁମୁହିଁ ହୋଇଥିଲେ।

ବୈଜୟନ୍ତଙ୍କ ଉପରେ ନଜର

ବିଜେଡିରୁ ଦଳରୁ ଇସ୍ତଫା ପରେ ବାପା ବଂଶୀଧର ପଣ୍ଡାଙ୍କ ଶୁଦ୍ଧିକ୍ରିୟା ଯୋଗୁଁ ଏ ପର୍ଯ୍ୟନ୍ତ ମୁହଁ ଖୋଲି ନାହାଁନ୍ତି ବୈଜୟନ୍ତ ।  ତମାମ୍ ଘଟଣା ଉପରେ ସେ କ’ଣ ପ୍ରତିକ୍ରିୟା ରଖୁଛନ୍ତି, ତାଙ୍କର ଆଗାମୀ ପଦକ୍ଷେପ କ’ଣ ହେବ ଏବେ ତା’ଉପରେ ସମସ୍ତଙ୍କ ନଜର।