ଜଳେଶ୍ୱର (ଅଜିତ୍ କୁମାର ଦାସ): ପଛରୁ ପିଟି ଦେଲା ପିକ୍ଅପ୍ ଭ୍ୟାନ୍। ଘଟଣାସ୍ଥଳରେ ଚାଲିଗଲା ଜଣେ ମହିଳାଙ୍କ ଜୀବନ। ତାଙ୍କ ସ୍ୱାମୀ ଓ ୨ ବର୍ଷର ଝିଅ ଗୁରୁତର ଅଛନ୍ତି। ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
ବାଲେଶ୍ୱର ଜିଲ୍ଲା ଲକ୍ଷ୍ମଣନାଥ ଟୋଲ୍ଗେଟ୍ ନିକଟରେ ଘଟିଛି ଏହି ଦୁର୍ଘଟଣା। ମୃତ ମହିଳାଙ୍କ ନାଁ ସସ୍ମିତା ସାମଲ। ତାଙ୍କ ସ୍ୱାମୀଙ୍କ ନାଁ ଅଶ୍ୱିନୀ କୁମାର ସାମଲ।
ଅଶ୍ୱିନୀ ବାଇକ୍ରେ ପତ୍ନୀ ଓ ଝିଅକୁ ନେଇ ଯାଉଥିବା ବେଳେ ୬୦ ନମ୍ବର ଜାତୀୟ ରାଜପଥର ଲକ୍ଷ୍ମଣନାଥ ଟୋଲ୍ଗେଟ୍ ନିକଟରେ ଏକ ପିକ୍ଅପ୍ ଭ୍ୟାନ୍ ସେମାନଙ୍କୁ ପଛରୁ ଦକ୍କା ଦେଇଥିଲା।
ସସ୍ମିତାଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଅଶ୍ୱିନୀ ଓ ତାଙ୍କ ଝିଅଙ୍କୁ ଉଦ୍ଧାର କରାଯାଇ ଜଳେଶ୍ୱର ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ତେବେ ଅବସ୍ଥା ସଙ୍କଟାପନ୍ନ ହେବାରୁ ସେମାନଙ୍କୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।