ନୂଆପଡ଼ା ଏକ କୃଷି ପ୍ରଧାନ ଜିଲ୍ଲା। ଏହି ଜିଲ୍ଲାର ଅଧିକାଂଶ ଲୋକେ ଚାଷ ଉପରେ ନିର୍ଭର କରି ପରିବାର ଭରଣପୋଷଣ କରନ୍ତି। ଚଳିତ ବର୍ଷ ଆରମ୍ଭରେ ଭଲ ବର୍ଷା ହୋଇଥିଲା। ଚାଷୀ ଭାବିଥିଲା ଗତ ବର୍ଷ ଅପେକ୍ଷା ଏବର୍ଷ ଭଲ ଚାଷ ହେବ। ସେହି ଖୁସିରେ ଚାଷୀ ଜମିରେ ହଳ କରିବା ସହିତ ତଳି ପକାଇଥିଲା। ଠିକ୍ ସମୟରେ ବିଲରେ ପାଣି ଲାଗିଥିବାରୁ ଚାଷୀ ଜମିରେ ଧାନ ଗଛ ରୋଇଥିଲା। ଭାବିଥିଲା ଭଲ ଚାଷ ହେବ। ହେଲେ ଧାରା ଶ୍ରାବଣର ଶେଷ ବେଳକୁ ବର୍ଷା ଉଭାନ୍ ହୋଇଗଲା। ଚାଷୀ ବହୁ କଷ୍ଟରେ ନାଳ, ଗାଡ଼ିଆ ଓ ପୋଖରୀରୁ ପାଣି ବୋହି କିଛି ଦିନ ଚାଷ ଜମିରେ ମଡ଼ାଇ ଥିଲେ। ବର୍ଷା ଅଭାବରୁ ଏବେ ନାଳ ଓ ପୋଖରୀ ଗୁଡିକ ଶୁଖିଗଲାଣି। ଫଳରେ ରୁଆ ଯାଇଥିବା ତଳି ମରିବାକୁ ବସିଲାଣି। କେତେକ ସ୍ଥାନରେ ଚାଷ ଜିମରେ ଗୋରୁ ଚରୁଥିବା ଦେଖିବାକୁ ମିଳିଛି।
ଖଇରଭାଡି ଗାଁର ମହିଳା ଚାଷୀ କୁନ୍ତୀ ମାଝି କହିଛନ୍ତି, “ଗତ ବର୍ଷ ପରି ଏବର୍ଷ ମଧ୍ୟ ଚାଷ ମରିଗଲାଣି। ପେଟ ପୋଷିବା ପାଇଁ ଗାଁରେ କାମ ମିଳୁ ନ ଥିବାରୁ ହାଇଦ୍ରାବାଦ ଯିବୁ। ଆଗରୁ ଆମକୁ ଗୋଟିଏ କାର୍ଡ଼ ମିଳିଥିଲା, ତାକୁ ନେଇଗଲେ।”
ଗଜିନ୍ଦ୍ର ମାଝି କହିଛନ୍ତି, “ବର୍ଷା ଅଭାବରୁ ଚାଷ ମରିବାକୁ ବସିଲାଣି। ଧାରଉଧାର କରି ଚାଷ କରିଥିଲୁ କେମିତି ଋଣ ସୁଝିବୁ ସେହି ଚିନ୍ତାରେ ପଡ଼ିଗଲୁଣି।”
ଲକ୍ଷ୍ମଣ ମାଝି କହିଛନ୍ତି, “ବର୍ଷା ହେଉ ନ ଥିବା ଯୋଗୁଁ ଚାଷ ମରିଗଲା। ବିପିଏଲ୍ କାର୍ଡ଼ ମିଳିଥିଲା ସରକାର ନେଇଗଲେ। ଗାଁରେ କାମ ମିଳୁ ନ ଥିବାରୁ ପେଟ ପୋଷିବା ପାଇଁ ଆମେ ଆନ୍ଧ୍ରପ୍ରଦେଶ ଯିବୁ।”
ଖଡିଆଳ କୃଷି ଜିଲ୍ଲା ଅଧିକାରୀ ନରୋତ୍ତମ ବେହେରା କହିଛନ୍ତି, “ଜୁଲାଇରେ ଭଲ ବର୍ଷା ହୋଇଥିଲା। ଅଗଷ୍ଟରେ କମ୍ ବର୍ଷା ହୋଇଥିବାରୁ ଚାଷ କାମ ପ୍ରଭାବିତ ହୋଇଛି। ସେଥିପାଇଁ ଚାଷୀମାନଙ୍କୁ କୁହାଯାଇଛି ଚାଷ ଜମିରେ ସାର ପ୍ରୟୋଗ କରନ୍ତୁ। ଉଚ୍ଚ ଜମି ଗୁଡ଼ିକରେ ଅଣଧାନ ଚାଷ କରିବାକୁ ପରାମର୍ଶ ଦିଆଯାଇଥିଲା। ସେମାନେ ଧାନ ଚାଷ କରିଥିବାରୁ ପାଣି ଅଭାବ ଦେଖାଦେଇଛି। ଉଚ୍ଚ ଜମିରେ ଯେଉଁ ଚାଷୀମାନେ ଚିନାବାଦାମ, କପା, ମକା ଓ ହରଡ଼ ଚାଷ କରିଛନ୍ତି ସେମାନେ ଲାଭବାନ ହୋଇଛନ୍ତି।”