ଆଦିବାସୀଙ୍କ ପାଇଁ ଖୁସି ଖବର; ଖୁବ୍‌ ଶୀଘ୍ର ଲାଗୁ ହେବ ପେସା ଆଇନ୍‌

ଆଦିବାସୀଙ୍କ ପାଇଁ ଖୁସି ଖବର। ବହୁ ପ୍ରତୀକ୍ଷିତ ପେସା ଆଇନ ପାଇଁ ଆଉ ପ୍ରତିବାଦ କରିବାକୁ ପଡିବନି। ଖୁବ୍‌ଶୀଘ୍ର ପେସା ଆଇନ୍‌ ଲାଗୁ କରିବେ ନୂଆ ସରକାର। ଜନଜାତୀୟ ଗୌରବ ଦିବସ ଅବସରରେ ଆଜି ଏହି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, ରାଜ୍ୟରେ ଖୁବ୍‌ଶୀଘ୍ର ଲାଗୁ ହେବ ପେଶା ଆଇନ୍। ତେବେ ତା’ ପୂର୍ବରୁ ଲୋକଙ୍କ ମତାମତ ନିଆଯିବ। ପେସା ଆଇନ୍ ବାବଦରେ ସଚେତନ କରାଯିବ। ଏଥିପାଇଁ ରାଜ୍ୟର ୨୭ଟି ଜିଲ୍ଲାର ୨୩୪ ବ୍ଲକରେ ୭ ହଜାର ୬୬୭ଟି ପଲ୍ଲୀସଭା ବା ଗ୍ରାମସଭା କରିବାକୁ ସରକାର ନିଷ୍ପତ୍ତି ନେଇଛନ୍ତି। ଏଥିପାଇଁ ପଞ୍ଚାୟତିରାଜ ବିଭାଗକୁ ଦାୟିତ୍ୱ ଦିଆଯାଇଛି। ଆସନ୍ତା ୨୬ ତାରିଖ ପର୍ଯ୍ୟନ୍ତ ଏଇ ପଲ୍ଲୀସଭା ଚାଲିବ। କେବଳ ସେତିକି ନୁହେଁ ଏହି ଅବସରରେ ଆଦିବାସୀଙ୍କ ପ୍ରତି ପୂର୍ବ ସରକାରର ଅବହେଳାର ଅଭିଯୋଗ ଆଣି ନିଜ ଅଭିଭାଷଣରେ ଧୁମ୍‌ ବର୍ଷିଥିଲେ ମୁଖ୍ୟମନ୍ତ୍ରୀ।

ଅନୁସୂଚିତ ଅଞ୍ଚଳର ବିକାଶ ଓ ଜନଜାତିଙ୍କ ସଶକ୍ତିକରଣ ପାଇଁ ୧୯୯୬ ମସିହାରେ ପଞ୍ଚାୟତ ସଂପ୍ରସାରଣ ଅଧିନିୟମ ବା ପେସା ଆଇନ ଆଣିଥିଲେ କେନ୍ଦ୍ର ସରକାର। ମୁଖ୍ୟ ଉଦ୍ଦେଶ୍ୟ ଥିଲା ଜନଜାତି ଅଞ୍ଚଳରେ ଗ୍ରାମସଭାକୁ ସର୍ବାଧିକ କ୍ଷମତାଶାଳୀ ଗ୍ରାମ୍ୟ ସଂଗଠନର ମାନ୍ୟତା ଦେବା। ଯହାଦ୍ୱାରା ବିକାଶ ପ୍ରକ୍ରିୟାରେ ଆଦିବାସୀଙ୍କ ଭାଗିଦାରୀ ବଢିବ। ଜମି ଅଧିଗ୍ରହଣ ଓ ହସ୍ତାନ୍ତର ସମୟରେ ଗ୍ରାମସଭାର ଅନୁମତି ଗୁରୁତ୍ୱପୂର୍ଣ୍ଣ ରହିବ। ବିଶେଷକରି ଜଙ୍ଗଲ ଆଉ ଜଙ୍ଗଲ ଜମି ଉପରେ ଆଦିବାସୀଙ୍କ ପ୍ରଥମ ଅଧିକାର ରହିବ।

ଗ୍ରାମସଭା ନିଷ୍ପତ୍ତିରେ ହେବ ବିକାଶମୂଳକ କାର୍ଯ୍ୟକ୍ରମ। ଏହା ଭିତରେ ୧୦ଟି ଜନଜାତି ଅଧ୍ୟୁଷିତ ରାଜ୍ୟ ଏଇ ନିୟମ ଲାଗୁ କରି ସାରିଛନ୍ତି। କିନ୍ତୁ ଆଇନ ଆସିବାର ୨୭ ବର୍ଷ ଭିତରେ ଓଡ଼ିଶା ଓ ଝାଡ଼ଖଣ୍ଡରେ ଏହା ଲାଗୁ ହୋଇ ପାରିନି। ତେବେ ନୂଆ ସରକାର ଆସିବା ପରେ ରାଜ୍ୟରେ ଏଥିପାଇଁ ପ୍ରକ୍ରିୟା ଆରମ୍ଭ ହୋଇଯାଇଛି। ପେସା ଆଇନ୍‌ ରୁଲ ଫ୍ରେମ୍‌ ନେଇ ସମସ୍ତ ବିଭାଗ ନିକଟରୁ କମ୍ପ୍ଲାଏନ୍ସ ରିପୋର୍ଟ ମଧ୍ୟ ମାଗି ସାରିଛି ପଞ୍ଚାୟତିରାଜ ବିଭାଗ।

ତେବେ ଏଠି ପ୍ରଶ୍ନ ଉଠୁଛି, ଦୀର୍ଘ ୨୪ ବର୍ଷ ଶାସନ ଭିତରେ କାହିଁକି ରୁଲ୍ ଫ୍ରେମ୍‌ କରି ପାରିଲାନି ବିଜେଡି ସରକାର? ପଲ୍ଲୀସଭାକୁ କାହିଁକି ବନ୍ଦ କରି ରଖିଥିଲେ ପୂର୍ବ ସରକାର? ବିଶେଷ କରି ଏହି ଯୋଜନା ଲାଗୁ ହୋଇଥିଲେ ଖଣିଅଞ୍ଚଳ ଗୁଡିକରେ କ୍ଷମତା ଗ୍ରାମସଭା ଓ ପଲ୍ଲୀସଭାକୁ ହାତକୁ ପଳାଇବାର ଭୟ ଘାରିଥିଲା କି ନବୀନ ସରକାରକୁ?

ଅନେକ ନିର୍ବାଚନରେ ପେଶା ଆଇନ୍‌ ପ୍ରସଙ୍ଗ ପାଲଟିଛି। ବାରମ୍ବାର ଏହି ଆଇନ ଲାଗୁ ନେଇ ବିଭିନ୍ନ ଜନଜାତି ସଂପ୍ରଦାୟ ରାଜଧାନୀରେ ବିକ୍ଷୋଭ ପ୍ରଦର୍ଶନ କରିଥିଲେ ମଧ୍ୟ ପୂର୍ବ ସରକାର ଏହାକୁ ଲାଗୁ କରାଇ ଦେଉନଥିଲେ। କିନ୍ତୁ ନୂଆ ସରକାର ପଲ୍ଲୀସଭା ଗୁଡିକରେ ଲୋକଙ୍କୁ ସଚେତନ କରି ମତାମତ ଗ୍ରହଣ କରିବା ପରେ ଏ ଦିଗରେ ଆଗକୁ ବଢ଼ି ଆସନ୍ତା ଶୀତ ଅଧିବେଶନରେ ପେସା ଆକ୍ଟ ଆଣି ପାରନ୍ତି ବୋଲି କୁହାଯାଉଛି।