ନୂଆଦିଲ୍ଲୀ: ଟୋକିଓ ଅଲିମ୍ପିକର ଦୁଇ ସପ୍ତାହ ପୂର୍ବରୁ ଗୁରୁବାର ନୂଆ କ୍ରୀଡ଼ା ମନ୍ତ୍ରୀ ଭାବେ ପଦ ସମ୍ଭାଳିଛନ୍ତି ଅନୁରାଗ ଠାକୁର। ଏହି ଗୁରୁତ୍ୱପୂର୍ଣ୍ଣ ପଦ ସମ୍ଭାଳିବା ପରେ ଅନୁରାଗ ଠାକୁର କହିଛନ୍ତି ଯେ ସବୁ କ୍ରୀଡ଼ା ମହାସଂଘ, ରାଜ୍ୟ ଓ ସମ୍ବନ୍ଧିତ ପକ୍ଷକୁ ଏକାଠି ନେଇ ସେ ଏକ ନୂଆ ଟିମ୍ ଭାବେ ଭାରତକୁ କ୍ରୀଡ଼ାରେ ଆଗକୁ ନେବା ପାଇଁ ପ୍ରୟାସ କରିବେ।
ଠାକୁର କ୍ରୀଡ଼ା ମନ୍ତ୍ରାଳୟର ପଦ ସମ୍ଭାଳିବା ପରେ କହିଛନ୍ତି, ଆମେ ସବୁ ଟିମ୍ ସହ ମିଶି ଦେଶରେ କ୍ରୀଡ଼ାର ଉନ୍ନତିିକରଣରେ କାମ କରିବୁ। ରାଜ୍ୟ, କ୍ରୀଡ଼ା ସଂସ୍ଥା, କ୍ରୀଡ଼ା ସଂଘ ଓ ମହାସଂଘକୁ ଏକତ୍ରିତ କରି ଯଥାସମ୍ଭବ କାମ କରିବୁ। ଯୁବ ଓ କ୍ରୀଡ଼ାକୁ ନେଇ ମୋତେ ନୂଆ ଦାୟିତ୍ୱ ଦେଇଥିବାରୁ ମୁଁ ପ୍ରଧାନମନ୍ତ୍ରୀ ଜୀଙ୍କୁ କୃତଜ୍ଞତା ଜଣାଉଛି। କ୍ରୀଡ଼ା ପ୍ରତି ତାଙ୍କର ଭଲପାଇବା ଓ ଭାରତକୁ କ୍ରୀଡ଼ା କ୍ଷେତ୍ରରେ ଆଗକୁ ବଢ଼ାଇବା ପାଇଁ ସେ ଯେଉଁ ଅଭିଯାନ ଚଳାଇଛନ୍ତି, ମୁଁ ପ୍ରୟାସ କରିବି ଯେ କିରନ ଜୀ (ପୂର୍ବତନ କ୍ରୀଡ଼ା ମନ୍ତ୍ରୀ) ଏହାକୁ ଯେଉଁ ପର୍ଯ୍ୟନ୍ତ ନେଇଛନ୍ତି, ମୁଁ ତାକୁ ଆଗକୁ ନେବି।
ଠାକୁର ଆହୁରି କହିଛନ୍ତି, ଦେଶର ପ୍ରଧାନମନ୍ତ୍ରୀ କ୍ରୀଡ଼ା ପ୍ରତି ବିଶେଷ ରୁଚି ରଖିଛନ୍ତି। ତାଙ୍କ ଭିଜନ୍ କାରଣରୁ ଦୁନିଆର ସବୁଠାରୁ ବଡ଼ କ୍ରିକେଟ୍ ଷ୍ଟାଡିୟମ ଭାରତରେ ନିର୍ମିତ ହୋଇଛି। ତାଙ୍କ ଭିଜନ୍ ଓ ସ୍ୱପ୍ନ ପୂରଣ କରିବା ପାଇଁ ଯଥାସମ୍ଭବ ପ୍ରୟାସ କରିବି ବୋଲି ଅନୁରାଗ କହିଛନ୍ତି।
କ୍ରୀଡ଼ା ସହ ଅନୁରାଗ ଠାକୁରଙ୍କ ପୁରୁଣ ସମ୍ପର୍କ ରହିଛି। ସେ ହିମାଚଳ ପ୍ରଦେଶ ପକ୍ଷରୁ ଗୋଟିଏ ରଣଜୀ ମ୍ୟାଚ୍ ଖେଳିଥିଲେ। ଏହାସହ ସେ ମେ', ୨୦୧୬ରୁ ଫେବୃଆରୀ ୨୦୧୭ ପର୍ଯ୍ୟନ୍ତ ବିସିସିଆଇର ଅଧ୍ୟକ୍ଷ ମଧ୍ୟ ଥିଲେ। ଏହା ପୂର୍ବରୁ ସେ ବିସିସିଆଇର ସମ୍ପାଦକ ଓ ହିମାଚଳ ପ୍ରଦେଶ କ୍ରିକେଟ୍ ଆସୋସିଏସନ୍ (ଏଚପିସିଏ)ର ଅଧ୍ୟକ୍ଷ ଥିଲେ। ତାଙ୍କ ଭାଇ ଅରୁଣ ଧୂମଲ ଏବେ ବିସିସିଆଇର କୋଷାଧ୍ୟକ୍ଷ ଅଛନ୍ତି। ଠାକୁର ହିମାଚଳ ପ୍ରଦେଶର ହମୀରପୁରରୁ ଲୋକସଭା ସାଂସଦ ଅଛନ୍ତି। ସୋ ଏହା ପୂର୍ବରୁ ଫାଇନାନ୍ସ ଓ କର୍ପୋରେଟର ରାଜ୍ୟ ମନ୍ତ୍ରୀ ଥିଲେ।
ମଣିଶଙ୍କର ଆୟରଙ୍କ ପରେ ଠାକୁର ପ୍ରଥମ କ୍ୟାବିନେଟ୍ ମନ୍ତ୍ରୀ, ଯାହାଙ୍କୁ କ୍ରୀଡ଼ା ମନ୍ତ୍ରଣାଳୟର ଦାୟିତ୍ୱ ଦିଆଯାଇଛି। ନୀତୀଶ ପ୍ରମାଣିକଙ୍କୁ କ୍ରୀଡ଼ା ମନ୍ତ୍ରାଳୟରେ ରାଷ୍ଟ୍ରମନ୍ତ୍ରୀ କରାଯାଇଛି। ଠାକୁରଙ୍କ ପାଖରେ ସୂଚନା ଓ ପ୍ରସାରଣ ମନ୍ତ୍ରାଳୟ ମଧ୍ୟ ରହିଛି।