ମୁମ୍ବାଇ: ଆସନ୍ତାକାଲିଠାରୁ ବିଶ୍ୱ ପରିକ୍ରମାରେ ଯିବ ୨୦୧୬ ଆଇସିସି ଟି-ଟ୍ୱେଣ୍ଟି ବିଶ୍ୱକପ୍ ଟ୍ରଫି। ବିଶ୍ୱର ୧୨ଟି ଦେଶ ପରିକ୍ରମା କରି ଫେବ୍ରୁୟାରୀ ୧ରେ ଏହା ନୂଆଦିଲ୍ଲୀକୁ ଫେରିବ। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ବିଭିନ୍ନ ରାଷ୍ଟ୍ରରେ ଏହା ପ୍ରଦର୍ଶିତ ହେବ। ଆଇସିସି ଚିଫ୍ ଏକଜିକ୍ୟୁଟିଭ ଡେଭିଡ୍ ରିଚାର୍ଡସନ କହିଛନ୍ତି, ଅନ୍ୟ ଦେଶରେ ଫଟାଫଟ କ୍ରିକେଟକୁ ଲୋକପ୍ରିୟ କରାଇବା ଟ୍ରଫି ପରିକ୍ରମାର ଉଦ୍ଦେଶ୍ୟ। ବିଶ୍ୱକପ୍ ଅନୁଷ୍ଠିତ ହେବା ପୂର୍ବରୁ କ୍ରିକେଟ ସମର୍ଥକମାନ ଅତି ନିକଟରୁ ଟ୍ରଫିକୁ ଦେଖିବାକୁ ଓ ଛୁଇଁବାର ଅଭିଜ୍ଞତା ହାସଲ କରିବେ। ଏହାଦ୍ୱାରା ବିଶ୍ୱସ୍ତରରେ ଟି-ଟ୍ୱେଣ୍ଟି କ୍ରିକେଟ ଲୋକପ୍ରିୟ ହୋଇପାରିବ ବୋଲି ସେ ଆଶା ପ୍ରକଟ କରିଛନ୍ତି।
ସୂଚନାଯୋଗ୍ୟ, ଟି-ଟ୍ୱେଣ୍ଟି ବିଶ୍ୱକପ ମାର୍ଚ୍ଚ ୮ତାରିଖରୁ ଭାରତରେ ଆରମ୍ଭ ହେଉଛି। ଏହା ଏପ୍ରିଲ ୩ ତାରିଖା ଯାଏଁ ଚାଲିବ। ଦେଶର ୮ଟି ସହରରେ ଏହି ବିଶ୍ୱକପର ମ୍ୟାଚଗୁଡିକ ଆୟୋଜିତ ହେବ।