ମାର୍କମ ଓ ଅଭିଷେକଙ୍କ ଅର୍ଦ୍ଧଶତକ, ଗୁଜରାଟକୁ ୧୯୬ ରନ୍‌ର ଟାର୍ଗେଟ

ମୁମ୍ବାଇ: ଯୁବ ତାରକା ଅଭିଷେକ ଶର୍ମା ଓ ଦକ୍ଷିଣ ଆଫ୍ରିକା ବ୍ୟାଟର ଏଡେନ ମାର୍କମଙ୍କ ଅର୍ଦ୍ଧଶତକ ବଳରେ ସନରାଇଜର୍ସ ହାଇଦ୍ରାବାଦ ନିର୍ଦ୍ଧାରିତ ୨୦ ଓଭର୍‌ରେ ୬ ୱିକେଟ ହରାଇ ୧୯୫ ରନ୍‌ କରିଛି। ଫଳରେ ଗୁଜରାଟ ଟାଇଟନ୍ସକୁ ଏହି ମ୍ୟାଚ୍‌ ଜିତିବା ପାଇଁ ୧୯୬ ରନ୍‌ର ଟାର୍ଗେଟ ମିଳିଛି।

ମୁମ୍ବାଇର ୱାଙ୍ଖଡେରେ ଖେଳା ଯାଉଥିବା ଏହି ମ୍ୟାଚ୍‌ରେ ଗୁଜରାଟ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଟସ୍‌ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲେ। ହାଇଦ୍ରାବାଦ ଦ୍ରୁତ ଆରମ୍ଭ କରିଥିଲେ ହେଁ ୨୬ ରନ୍‌ରେ ଦଳର ଅଧିନାୟକ କେନ୍‌ ୱିଲିୟମସନ(୫)ଙ୍କୁ ହରାଇଥିଲା। ତାଙ୍କ ୱିକେଟ ମହମ୍ମଦ ଶାମି ନେଇଥିଲେ। ଏହାପରେ ରାହୁଲ ତ୍ରିପାଠୀ ଦ୍ରୁତ ଗତିରେ ରନ୍‌ ସଂଗ୍ରହ କରିବା ଲକ୍ଷ୍ୟରେ ମହମ୍ମଦ ଶାମିଙ୍କ ଦ୍ୱିତୀୟ ଶିକାର ବନିଥିଲେ। ସେ ୧୦ ବଲ୍‌ରେ ୧୬ ରନ୍‌ କରିଥିଲେ।

୪୪ ରନ୍‌ରେ ଦୁଇ ୱିକେଟ ହରାଇଥିବା ହାଇଦ୍ରାବାଦ ପାଇଁ ଅଭିଷେକ ଓ ମାର୍କମ ଯୋଡ଼ି ସ୍ଥିତି ସମ୍ଭାଳିଥିଲେ। ଉଭୟ ଦ୍ରୁତଗତିରେ ରନ୍‌ ସଂଗ୍ରହ କରିବା ସହ ତୃତୀୟ ୱିକେଟ ପାଇଁ ୯୬ ରନ୍‌ ଯୋଡ଼ିଥିଲେ। ଏଥିସହ ଅଭିଷେକ ଶର୍ମା ଛକା ମାରି ନିଜର ଅର୍ଦ୍ଧଶତକ ବି ହାସଲ କରିଥିଲେ। ଦଳୀୟ ସ୍କୋର ୧୪୦ ଥିବା ବେଳେ ଅଭିଷେକ ଶର୍ମା(୬୫)ଙ୍କୁ ଅଲଜାରି ଯୋଶେଫ କ୍ଲିନବୋଲ୍ଡ କରିଦେଇଥିଲେ।

ଆଉଟ ହେବା ପୂର୍ବରୁ ୪୨ଟି ବଲର ସମ୍ମୁଖୀନ ହୋଇଥିବା ଅଭିଷେକ ୩ଟି ଛକା ଓ ୬ଟି ଚୌକା ବଳରେ ୬୫ ରନ୍‌ କରିଥିଲେ। ସେ ଆଉଟ ହେବା ପରେ ମାର୍କମ ମଧ୍ୟ ଛକା ମାରି ନିଜର ଅର୍ଦ୍ଧଶତକ ହାସଲ କରିଥିଲେ। ସେ ୪୦ ବଲ୍‌ରେ ୫୬ ରନ୍‌ କରିଥିବା ବେଳେ ୟାଶ ଦୟାଲଙ୍କ ବଲରେ ପ୍ୟାଭିଲିୟନ ଫେରିଥିଲେ। ଏହି ଇନିଂସରେ ମାର୍କମ ୩ଟି ଛକା ଓ ୨ଟି ଚୌକା ମାରିଛନ୍ତି।

ଅନ୍ୟମାନଙ୍କ ମଧ୍ୟରେ ନିକୋଲ୍ସ ପୁରନ ୩ ଓ ୱାଶିଂଟନ ସୁନ୍ଦର ୩ ରନ୍‌ କରିଛନ୍ତି। ଶେଷ ଭାଗରେ ଶଶାଙ୍କ ସିଂହ ଓ ମାର୍କୋ ଜାନସେନ ବିସ୍ଫୋରକ ବ୍ୟାଟିଂ କରିଥିଲେ। ବିଶେଷ କରି ଶେଷ ଓଭର୍‌ରେ ଜାନସେନ ଗୋଟିଏ ଛକା ମାରିଥିବା ବେଳେ ଶଶାଙ୍କ ୩ଟି ଛକା ମାରି ଦଳୀୟ ସ୍କୋରକୁ ୧୯୫ରେ ପହଞ୍ଚାଇ ଦେଇଥିଲେ। ଶଶାଙ୍କ ୬ ବଲରେ ୨୫ ଓ ଜାନସେନ ୫ ବଲ୍‌ରେ ୮ ରନ୍‌ କରି ଅପରାଜିତ ରହିଥିଲେ। ଶେଷ ୫ ଓଭର୍‌ରେ ହାଇଦ୍ରାବାଦ ୧୧ ରନ୍‌ରେ ରନ୍‌ ସଂଗ୍ରହ କରିଛି। ଏଥିସହ ଶେଷ ୫ ଓଭର୍‌ରେ ଦଳ ୪ ୱିକେଟ ମଧ୍ୟ ହରାଇଛି।

ଗୁଜରାଟ ପକ୍ଷରୁ ମହମ୍ମଦ ଶାମି ୩ଟି ୱିକେଟ ନେଇଥିବା ବେଳେ ୟାଶ ଦୟାଲ ଓ ଯୋଶେଫ ଗୋଟିଏ ଲେଖାଏ ସଫଳତା ପାଇଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।