ନୂଆଦିଲ୍ଲୀ: କ୍ରିକେଟକୁ କୁହାଯାଏ ଭଦ୍ର ଲୋକଙ୍କ ଖେଳ। ଆଉ ଏହି ଧାରା ଓ ବିଶ୍ୱାସ ବଜାୟ ରଖିବାରେ ସହାୟକ ହୋଇଛି ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)। ଭାରତୀୟ ଦିନିକିଆ ଟିମର ଅଧିନାୟକ ମହେନ୍ଦ୍ର ସିଂ ଧୋନୀ ସୋମବାର ଏହି କଥା କହିଛନ୍ତି। ସେ କହିଛନ୍ତି, ଆଇପିଏଲ ଭଦ୍ର ଲୋକଙ୍କ ଖେଳ କୁହାଯାଉଥିବା କ୍ରିକେଟର ସେହି ଉନ୍ମାଦନାକୁ ବଜାୟ ରଖିଛି। ବିଶ୍ୱର ସସସ୍ତ ଖେଳାଳିଙ୍କୁ ଗୋଟିଏ ସୂତାରେ ଏକତ୍ର କରି ବାନ୍ଧିଛି ଆଇପିଏଲ। ଆଇପିଏଲ କ୍ରିକେଟରୁ ସ୍ଲେଜିଂ (ପରସ୍ପର ପ୍ରତି ଅଶ୍ଳୀଳ ଟିପ୍ପଣୀ ବା ଇଙ୍ଗିତ)କୁ ଦୂରେଇଛି।
ଧୋନୀ କହିଛନ୍ତି,‘ ଆମେ ଏକ ଭଦ୍ର ଲୋକଙ୍କ ଖେଳ ଖେଳୁଛୁ। ଆମେ ଜିତିବାକୁ ଚାହୁଁ। କିନ୍ତୁ ଆମକୁ ଠିକ୍ ଢଙ୍ଗରେ ମ୍ୟାଚ୍ ଜିତିବାକୁ ପଡ଼ିବ। ଆଇପିଏଲ୍ କ୍ରିକେଟରୁ ସ୍ଲେଜିଂକୁ ଦୂରେଇ ଦେଇଛି। ବନ୍ଧୁତ୍ୱପୂର୍ଣ୍ଣ ଭାବେ ଆଇପିଏଲ୍ ମ୍ୟାଚଗୁଡ଼ିକ ଖେଳା ଯାଉଛି। ସ୍ଲେଜିଂରୁ ଦୂରେଇ ରହିବାରେ ଏହା କ୍ରିକେଟରମାନଙ୍କୁ ସାହାଯ୍ୟ କରୁଛି। ଆଇପିଏଲରେ ବିଭିନ୍ନ ଦେଶ ଓ ସଂସ୍କୃତିର ଖେଳାଳି ଗୋଟିଏ ଗୋଟିଏ ଟିମରେ ଖେଳୁଛନ୍ତି। ଗୋଟିଏ ଡ୍ରେସିଂ ରୁମ୍ ସେୟାର କରୁଛନ୍ତି। ପରସ୍ପରର ନିକଟତର ହେଉଛନ୍ତି।