ଅଷ୍ଟ୍ରେଲିଆ ସିରିଜ ପୂର୍ବରୁ ଭାରତକୁ ଝଟ୍‌କା: ଧାୱନ ପ୍ରଥମ ୩ଟି ମ୍ୟାଚ୍‌ ଖେଳିବେ ନାହିଁ

ଭୁବନେଶ୍ୱର(ଓଡ଼ିଶା ରିପୋର୍ଟର):ଟିମ୍ ଇଣ୍ଡିଆ ଓପ୍ନର ଶିଖର ଧାୱନ ଅଷ୍ଟ୍ରେଲିଆ ବିପକ୍ଷ ପ୍ରଥମ ତିନୋଟି ଦିନିକିଆ ମ୍ୟାଚରେ ଖେଳିବେନି। ତାଙ୍କ ସ୍ତ୍ରୀ ଆଏଶାଙ୍କ ଦେହ ଖରାପ ଥିବାରୁ ସେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ ବିସିସିଆଇକୁ ନଖେଳିବା ଲାଗି ଅନୁରୋଧ କରିଛନ୍ତି। ବିସିସିଆଇର ଜାତୀୟ ମନୋନୟନ କମିଟି ମଧ୍ୟ ଧାୱନଙ୍କ ନିବେଦନରେ ସହମତି ପ୍ରକାଶ କରିଛି। ତେବେ ତାଙ୍କ ସ୍ଥାନରେ ଆଉ କୌଣସି ଖେଳାଳିଙ୍କ ନାଁ ଘୋଷଣା ନକରିବାର ନିଷ୍ପତ୍ତି ନେଇଛି ବିସିସିଆଇ। ଧାୱନ ଗତ ଶ୍ରୀଲଙ୍କା ସିରିଜରେ ମଧ୍ୟ ତାଙ୍କ ଅସୁସ୍ଥ ମାଙ୍କ ଦେଖାଶୁଣା ପାଇଁ ଶେଷ ଦିନିକିଆ ଏବଂ ଟି-୨୦ ମ୍ୟାଚ ଖେଳିବାରୁ ବଞ୍ଚିତ ହୋଇଥିଲେ। ଧାୱନ ଚାମ୍ପିଅନ୍ସ ଟ୍ରଫି ପରଠୁ ଜବରଦସ୍ତ ଫର୍ମରେ ଅଛନ୍ତି। ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜରେ ଭାରତ ପକ୍ଷରୁ ସର୍ବାଧିକ ୩୫୮ ରନ୍ ଏବଂ ପ୍ରଥମ ଦିନିକିଆରେ ୧୩୨ ରନ୍ କରିଥିଲେ।  ଏପରି ସ୍ଥିତିରେ ଟିମ୍ ଇଣ୍ଡିଆର ଚିନ୍ତା ଏବେ ବଢ଼ି ଯାଇଛି।