ଦିଲ୍ଲୀ-ବେଙ୍ଗଲ ରଣଜୀ ମ୍ୟାଚ୍: ଅମ୍ପାୟାରଙ୍କୁ ଠେଲାପେଲା କଲେ ଗମ୍ଭୀର, ହୋଇପାରନ୍ତି ବାସନ୍ଦ

ନୂଆଦିଲ୍ଲୀ: ଦିଲ୍ଲୀରେ ଦିଲ୍ଲୀ-ବେଙ୍ଗଲ ରଣଜୀ ଟ୍ରଫି କ୍ରିକେଟ୍ ମ୍ୟାଚ୍ ବେଳେ ଅପ୍ରୀତିକର ଘଟଣା ଘଟିଛି। ଦିଲ୍ଲୀ ଅଧିନାୟକ ତଥା ଅନ୍ତର୍ଜାତୀୟ ଖେଳାଳି ଗୌତମ ଗମ୍ଭୀର ମ୍ୟାଚ ବେଳେ ଅମ୍ପାୟାରଙ୍କୁ ଉତ୍ତେଜିତ ହୋଇ ଠେଲାପେଲା କରିଥିବା ଅଭିଯୋଗ ହୋଇଛି। ଏହି ଘଟଣା ପରେ ଗମ୍ଭୀରଙ୍କ ଉପରେ ବ୍ୟାନ୍ ଲାଗିବା ନେଇ ଆଶଙ୍କା ସୃଷ୍ଟି ହୋଇଛି।
ଗତକାଲି ରଣଜୀ ଟ୍ରଫିର ଏକ ମ୍ୟାଚ ବେଳେ ବେଙ୍ଗଲ ବ୍ୟାଟସମ୍ୟାନ୍ ତଥା ଅଧିନାୟକ ମନୋଜ ତିୱାରୀ ବ୍ୟାଟିଂ ପାଇଁ ପଡିଆକୁ ଆସିଥିଲେ। ବଲକୁ ସାମ୍ନା କରିବା ପୂର୍ବରୁ ମନୋଜ ହେଲମେଟ୍ ଆଣିବାକୁ ଟ୍ରେସିଂ ରୁମକୁ ଇସାରା ଦେଇଥିଲେ। ଯାହାକୁ ବିରୋଧ କରିଥିଲେ ଦିଲ୍ଲୀ ଖେଳାଳି। ପରେ ଏହାକୁ ନେଇ ଗମ୍ଭୀର ଓ ମନୋଜ ତିୱାରୀଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଅମ୍ପାୟାର ଶ୍ରୀନାଥ ଉଭୟଙ୍କୁ ବୁଝାଶୁଝା କରିବାକୁ ଚେଷ୍ଟା କରୁଥିବା ବେଳେ ଗମ୍ଭୀର ତାଙ୍କୁ ଠେଲି ଦେଇଥିବା ଅଭିଯୋଗ ହୋଇଛି। ଉଭୟ ଗମ୍ଭୀର ଓ ମନୋଜଙ୍କୁ ମ୍ୟାଚ୍ ରେଫରୀ ସମନ ଜାରି କରିଛନ୍ତି। ଘଟଣା ପାଇଁ ଡିଡିସିଏ ଗମ୍ଭୀରଙ୍କୁ ତାଙ୍କ ମ୍ୟାଚ୍ ଫି'ର ୫୦ ପ୍ରତିଶତ ଜରିମାନା କରିଛି।