ଲାଉଡରହିଲ୍: ଟିମ୍ ଇଣ୍ଡିଆ ଭାଇସ୍ କ୍ୟାପଟେନ୍ ରୋହିତ୍ ଶର୍ମା ଟି-୨୦ରେ ଏକ ନୂଆ ବିଶ୍ୱ ରେକର୍ଡର ଅଧିକାରୀ ହୋଇଛନ୍ତି। ସେ ଅନ୍ତର୍ଜାତୀୟ ଟି-୨୦ କ୍ରିକେଟରେ ସର୍ବାଧିକ ଛକା ହାସଲକାରୀ ବ୍ୟାଟ୍ସମ୍ୟାନ୍ ହୋଇଛନ୍ତି। ଏହାବ୍ୟତୀତ ସେ ପ୍ରଥମ ବ୍ୟାଟ୍ସମ୍ୟାନ୍ ଭାବେ ଏହି ଫର୍ମାଟରେ ୨୪୦୦ ରନ୍ କରିଛନ୍ତି।
ରବିବାର ୱେଷ୍ଟଇଣ୍ଡିଜ୍ ବିପକ୍ଷ ମ୍ୟାଚରେ ରୋହିତ୍ ୬୭ ରନ୍ କରି ଆଉଟ୍ ହୋଇଥିଲେ। ନିଜର ଏହି ଇନିଂସରେ ରୋହିତ୍ ୬ ଚୌକା ଓ ୩ଟି ଛକା ମାରିଥିଲେ। ଭାରତ ଇନିଂସର ଏକାଦଶ ଓଭରରେ ରୋହିତ୍ ସୁନୀଲ ନାରିନଙ୍କ ବଲରେ ଛକା ମାରିବା ସହ ରୋହିତ୍ କ୍ରିସ୍ ଗେଲଙ୍କ ରେକର୍ଡକୁ ପଛରେ ପକାଇ ଦେଇଥିଲେ।
୩୨ ବର୍ଷୀୟ ରୋହିତ୍ ଟି-୨୦ରେ ମୋଟ ୧୦୭ ଛକା ମାରିଛନ୍ତି। ଏହି ମାମଲାରେ ଗେଲ୍ ୧୦୫ଟି ଛକା ସହ ଏବେ ଦ୍ୱିତୀୟ ସ୍ଥାନକୁ ଖସି ଯାଇଛନ୍ତି। ଗେଲଙ୍କ ପରେ ନ୍ୟୁଜିଲ୍ୟାଣ୍ଡର ମାର୍ଟିନ୍ ଗପ୍ଟିଲ୍ ୧୦୩ ଛକା ସହ ତୃତୀୟ ସ୍ଥାନରେ ଅଛନ୍ତି।
ରୋହିତଙ୍କ ନାମରେ ଟି-୨୦ରେ ସର୍ବାଧିକ ରନର ରେକର୍ଡ ମଧ୍ୟ ରହିଛି। ସେ ପ୍ରଥମ ବ୍ୟାଟ୍ସମ୍ୟାନ୍ ଭାବେ ଏହି ଫର୍ମାଟରେ ୨୪୦୦ରୁ ଅଧିକ କରିଛନ୍ତି। ତାଙ୍କ ନାମରେ ଏପର୍ଯ୍ୟନ୍ତ ୯୬ ମ୍ୟାଚର ୮୮ ଇନିଂସରେ ୩୨.୭୨ ହାରରେ ୨୪୨୨ ରନ୍ ରହିଛି। ରୋହିତ୍ ଏପର୍ଯ୍ୟନ୍ତ ୪ ଶତକ ଏବଂ ୧୭ ଅର୍ଦ୍ଧଶତକ ମାରିଛନ୍ତି। ଭାରତ ବିପକ୍ଷ ଟି-୨୦ ସିରିଜରେ ଗେଲ୍ ଖେଳୁନାହାନ୍ତି, କାରଣ ଏହି ଫର୍ମାଟ୍ ପାଇଁ ତାଙ୍କୁ ବିଶ୍ରାମ ଦିଆଯାଇଛି। ସେ ଭାରତ ବିପକ୍ଷ ଦିନିକିଆ ସିରିଜ୍ ଖେଳିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
