ଜୟପୁର: ନ୍ୟୁଜିଲ୍ୟାଣ୍ଡ୍ କ୍ରିକେଟ୍ ଟିମର ଲେଗ୍ ସ୍ପିନର ଇଶ ସୋଢୀ ଆଇପିଏଲର ପରବର୍ତ୍ତୀ ସଂସ୍କରଣ ପାଇଁ ରାଜସ୍ଥାନ ରୟାଲ୍ସ ଦଳର ସ୍ପିନ୍ ପରାମର୍ଶଦାତା ହୋଇଛନ୍ତି। ୨୭ ବର୍ଷୀୟ ଏହି ସ୍ପିନର ଜଣକ ୨୦୧୮ ଓ ୨୦୧୯ ସଂସ୍କରଣରେ ରାଜସ୍ଥାନ ରୟାଲ୍ସ ଦଳର ସଦସ୍ୟ ଥିଲେ, କିନ୍ତୁ ଗତମାସରେ ଆଇପିଏଲ୍ ନିଲାମ ପାଇଁ ତାଙ୍କୁ ରିଲିଜ୍ କରିଦିଆଯାଇଥିଲା।
ଏବେ ସୋଢୀ ବୋଲିଂ କୋଚ୍ ସାଇରାଜ ବାହୁତୁଲେ ଏବଂ ଚିଫ୍ ଅପରେଟିଂ ଅଫିସର୍ ଜେକ୍ ଲୁଶ୍ ମ୍ୟାକକ୍ରୁମଙ୍କ ସହ କାମ କରିବେ। ସୋଢୀ ଆଇପିଏଲରେ ମୋଟ ୮ଟି ମ୍ୟାଚ୍ ଖେଳି ୯ଟି ୱିକେଟ୍ ନେଇଛନ୍ତି, ଯେଉଁଥିରେ ତାଙ୍କର ଇକୋନମୀ ରେଟ୍ ୬.୬୯ ରହିଛି।
ସେହିପରି ସୋଢୀ ନ୍ୟୁଜିଲ୍ୟାଣ୍ଡ୍ ପକ୍ଷରୁ ୪୦ ଟି-୨୦ ମ୍ୟାଚରେ ୪୭ ୱିକେଟ୍ ହାସଲ କରିଛନ୍ତି। ଏହାଛଡ଼ା ସେ ଜାତୀୟ ଦଳ ପକ୍ଷରୁ ୧୭ ଟେଷ୍ଟ ଓ ୩୧ ଦିନିକିଆ ମ୍ୟାଚ୍ ଖେଳିଛନ୍ତି।