ଭୁବନେଶ୍ୱର (ଓଡ଼ିଶା ରିପୋର୍ଟର): ସବୁ ମନୋମାଳିନ୍ୟ ଦୂର କରି ହାଇଦ୍ରାବାଦର ଗୋପୀଚାନ୍ଦ ଏକାଡେମୀରେ ଯୋଗ ଦେଇଛନ୍ତି ବ୍ୟାଡ୍ମିଣ୍ଟନ ଖେଳାଳି ସାଇନା ନେହୱାଲ। ଆଜିଠୁ ସେ ଏଠାରେ ଅଭ୍ୟାସ ଜାରି ରଖିବେ। ୨୦୧୪ରେ କୋଚ୍ ଗୋପୀଚାନ୍ଦଙ୍କ ସହ ମତଭେଦ ହେବା ପରେ ସାଇନା ଗୋପୀଚାନ୍ଦ ଏକାଡେମୀ ଛାଡ଼ି ଦେଇଥିଲେ। ଏହାପରେ ସେ ବାଙ୍ଗାଲୁରଠାରେ କୋଚ୍ ବିମଲ କୁମାରଙ୍କ ଠାରୁ ପ୍ରଶିକ୍ଷଣ ନେଉଥିଲେ। ବର୍ତ୍ତମାନ କୋଚ୍ ବିମଲଙ୍କ ସହ ତାଙ୍କର ମତଭେଦ ହୋଇଥିବା ଶୁଣିବାକୁ ମିଳୁଛି। ହେଲେ ସାଇନା ଗୋପୀଚାନ୍ଦ ଏକାଡେମୀରେ ଯୋଗ ଦେବା ପରେ ସେ ଖୁସି ଜାହିର କରିବା ସହ ପୁଣିଥିରେ ତାଙ୍କୁ ଏକାଡେମୀରେ ସ୍ଥାନ ମିଳିଥିବାରୁ ଗୋପିଚାନ୍ଦୁଙ୍କୁ ଧନ୍ୟବାଦ ଜଣାଇଛନ୍ତି। ଏହାସହ ପାଖାପାଖି ୩ବର୍ଷ ଧରି ବିମଲ କୁମାରଙ୍କ ଠାରୁ କୋଚିଂ ନେଇଆସିଥିବାରୁ ତାଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି। ସେ ଏହା ମଧ୍ୟ କହିଛନ୍ତି କୋଚ୍ ବିମଲ କୁମାରଙ୍କ ଠାରୁ କୋଚିଂ ନେବା ସମୟରେ ସେ ବିଶ୍ୱ ମାନ୍ୟତାରେ ଶୀର୍ଷ ସ୍ଥାନରେ ପହଞ୍ଚିଥିବା ସହ ବିଶ୍ୱ ବ୍ୟାଡ୍ମିଣ୍ଟନ ଚାମ୍ପିୟନସିପରେ ସିଲଭର୍ ଓ ବ୍ରୋଞ୍ଜ ପଦକ ହାସଲ କରିବାର ସୌଭାଗ୍ୟଲାଭ କରିଥିଲେ।