ଶଶାଙ୍କ ମନୋହର ବିସିସିଆଇର ନୂଆ ଅଧ୍ୟକ୍ଷ

ମୁମ୍ବାଇ: ଶଶାଙ୍କ ମନୋହର ହେଲେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ)ର ନୂଆ ଅଧ୍ୟକ୍ଷ।  ଆଜି ମୁମ୍ୱାଇରେ ଅନୁଷ୍ଠିତ ବିସିସିଆଇର ସ୍ୱତନ୍ତ୍ର ସାଧାରଣ ପରିଷଦ ବୈଠକରେ ସେ ନିର୍ଦ୍ୱନ୍ଦ୍ୱରେ ଏହି ପଦ ପାଇଁ ନିର୍ବାଚିତ ହୋଇଛନ୍ତି। ମନୋହର ଏକମାତ୍ର ପ୍ରାର୍ଥୀ ଭାବେ ନାମାଙ୍କନପତ୍ର ଦାଖଲ କରିଥିଲେ।  ଏଥର ଅଧ୍ୟକ୍ଷ ମନୋନୟନର ପାଳି ଇଷ୍ଟ ଜୋନର ଥିବା ବେଳେ ଓଡିଶା କ୍ରିକେଟ ଆସୋସିଏସନ୍ ସମେତ ଇଷ୍ଟ ଜୋନର ସମସ୍ତ ୬ଟି ଯାକ ସଦସ୍ୟ ମନୋହରଙ୍କୁ ମନୋନୀତ କରିଥିବା ଜଣାପଡିଛି। ତାଙ୍କ ପ୍ରତି ଉଭୟ ଶରଦ ପାୱାର ଓ ଅନୁରାଗ ଠାକୁରଙ୍କ ଗୋଷ୍ଠୀଙ୍କ ମଧ୍ୟ ସମର୍ଥନ ରହିଥିଲା।  ଜଗମୋହନ ଡାଲମିଆଙ୍କ ମୃତ୍ୟୁ ପରେ ବିସିସିଆଇ ଅଧ୍ୟକ୍ଷ ପଦବୀ ଖାଲି ପଡ଼ିଥିଲା। ଶଶାଙ୍କ ମନୋହର ଦ୍ୱିତୀୟ ଥର ପାଇଁ ବିଶ୍ୱର ସବୁଠାରୁ ପ୍ରଭାବଶାଳୀ କ୍ରିକେଟ ବୋର୍ଡର ଅଧ୍ୟକ୍ଷ ଦାୟିତ୍ୱ ନେଇଛନ୍ତି। ପୂର୍ବରୁ ସେ ୨୦୦୮ ମସିହା ଅକ୍ଟୋବରରୁ ୨୦୧୧ ସେପଟେମ୍ୱର ପର୍ଯ୍ୟନ୍ତ ବିସିସିଆଇର ଅଧ୍ୟକ୍ଷ ଥିଲେ।