ଆନନ୍ଦଆତ୍ମା ଆଶ୍ରମ ଘଟଣା: ଦୁଇ ଦିନିଆ ରିମାଣ୍ଡରେ ଗଲେ ଆଲୋକ ବାବା

କଟକ: ଆଜିଠାରୁ ପୋଲିସ ରିମାଣ୍ଡରେ ଯାଇଛନ୍ତି ସାଲେପୁର ଆନନ୍ଦ ଆତ୍ମା ଆଶ୍ରମ ପରିସରରେ ଯୁବକଙ୍କୁ ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ଆନନ୍ଦ ଆତ୍ମା ବାବା ଓରଫ୍ ଆଲୋକ ବିଷୋୟୀ। ତାଙ୍କୁ ଦୁଇ ଦିନ ଲାଗି ରିମାଣ୍ଡରେ ନେଇଛି ସାଲେପୁର ପୋଲିସ।

ଗତକାଲି ପୋଲିସ ଆଲୋକଙ୍କୁ ସାଲେପୁର ଜେଏମଏଫସି କୋର୍ଟରେ ହାଜର କରି ୩ ଦିନ ରିମାଣ୍ଡରେ ନେବାକୁ ଆବେଦନ କରିଥିଲା। କୋର୍ଟ ୨ଦିନ ରିମାଣ୍ଡରେ ନେବାକୁ ଅନୁମତି ଦେଇଥିଲେ। ରବିବାର ପୋଲିସ ଫରେନସିକ୍ ଟିମ୍ ସହ ଆଶ୍ରମକୁ ଯାଇ ଛାନ୍ ଭିନ୍ କରିବା ସହ ହତ୍ୟାକାଣ୍ଡରେ ବ୍ୟବହୃତ କଟୁରୀ ଓ ଠେଙ୍ଗା ଜବତ କରିଥିଲା। ପୋଲିସର କହିବା ଅନୁସାରେ ଶନିବାର ଦିନ ୨ଟାରୁ ୩ଟା ମଧ୍ୟରେ ପାଖ ଗାଁରେ ପାନଦୋକାନ କରିଥିବା ଅଶୋକ ଅନ୍ୟ ୩ ଜଣଙ୍କ ସହ ଆଶ୍ରମରେ ପହଞ୍ଚିଥିଲେ। ସେଠାରେ ଆଲୋକଙ୍କ ସହ ତାଙ୍କର ଦୁଇ ପୁତୁରା ଓ ଅନ୍ୟ ଜଣେ ଉପସ୍ଥିତ ଥିଲେ। କୌଣସି କାରଣରୁ ସେମାନଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ପରେ ଅଶୋକଙ୍କ ଅର୍ଦ୍ଧଦଗ୍ଧ ମୃତଦେହ ଆଶ୍ରମ ପରିସରରୁ ଜବତ ହୋଇଥିଲା। ଆଲୋକ ଗିରଫ ହୋଇଥିବା ବେଳେ ତାଙ୍କ ଦୁଇ ପୁତୁରା ଓ ଅନ୍ୟ ଜଣେ ଅଭିଯୁକ୍ତ ଫେରାର ଅଛନ୍ତି। ହତ୍ୟା ଅଭିଯୋଗକୁ ଖଣ୍ଡନ କରିଛନ୍ତି ଆଲୋକ ବିଷୋୟୀ।