ଭୁବନେଶ୍ୱର: ଭୁବନେଶ୍ୱର ବିମାନବନ୍ଦରରେ ଆଜି ଇଣ୍ଡିଗୋର ଏକ ବିମାନରେ ପକ୍ଷୀ ମାଡ଼ ହୋଇଛି। କୋଲକାତାରୁ ଆସିଥିବା ଏହି ବିମାନଟି ସକାଳ ୮ଟା ୧୦ମିନିଟ୍ରେ ଭୁବନେଶ୍ୱରରେ ଅବତରଣ କରିଥିଲା। ଏହି ସମୟରେ ବିମାନର ୱିଙ୍ଗରେ ପକ୍ଷୀ ମାଡ଼ ହୋଇଥିଲା। ଫଳରେ ଏହାର ୱିଙ୍ଗ୍ ସମ୍ପୂର୍ଣ୍ଣଭାବେ କ୍ଷତିଗ୍ରସ୍ତ ହୋଇଛି। ବିମାନଟିକୁ ମରାମତି ପାଇଁ ପଠାଯିବ ବୋଲି ଜଣାପଡ଼ିଛି।
ଦୁର୍ଘଟଣାର କିଛି ମସୟ ପରେ ନୂଆଦିଲ୍ଲୀରୁ ଭୁବନେଶ୍ୱର ଆସୁଥିବା ଇଣ୍ଡିଗୋ ବିମାନଟି ପହଞ୍ଚିଥିଲା। ଏହି ବିମାନରେ ମୁମ୍ୱାଇ ଯିବାକୁ ଥିବା ଯାତ୍ରୀମାନଙ୍କୁ ପଠାଇ ଦିଆଯାଇଛି। ଏହାସହ ଦିଲ୍ଲୀ ବିମାନକୁ ବାତିଲ୍ କରାଯାଇଛି। ଫଳରେ ଦିଲ୍ଲୀ ଯିବାକୁ ଥିବା ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଭୁବନେଶ୍ୱର ବିମାନ ବନ୍ଦରରେ ବାର୍ଡ ହିଟ୍ ସମସ୍ୟାକୁ ରୋକିବା ପାଇଁ ବିମାନ କର୍ତ୍ତୃପକ୍ଷ ଅନେକ ପଦକ୍ଷେପ ନେଉଛନ୍ତି। ତଥାପି ସମସ୍ୟାର ସମାଧାନ ହୋଇପାରୁ ନାହିଁ। ଗତ ମେ’ ୫ ତାରିଖରେ ନୂଆଦିଲ୍ଲୀରୁ ଆସିଥିବା ଏୟାର ଭିସ୍ତାରାର ଏକ ବିମାନ ଏଠାରେ ଅବତରଣ କଲା ବେଳେ ପକ୍ଷୀ ମାଡ଼ ହୋଇଥିଲା। ଫଳରେ ଏହାର ସମ୍ମୁଖଭାଗ କ୍ଷତିଗ୍ରସ୍ତ ହୋଇଥିଲା।