୧୨ ତାରିଖରେ କରାଯାଇଥିବା ଏଲିସା ଟେଷ୍ଟ ୫ କୋଟି ଟଙ୍କା ମୂଲ୍ୟର ଅତ୍ୟାଧୁନିକ ଅଟୋମେଟିକ୍ ଏଲିଜା ପ୍ରସେସର ମେସିନ୍ରେ ହୋଇଥିବା ବେଳେ ଆଜିର ଟେଷ୍ଟ ମାଇକ୍ରୋ ବାୟୋଲୋଜି ବିଭାଗର ବହୁ ପୁରୁଣା ମେସିନ୍ରେ ସମ୍ପୂର୍ଣ୍ଣ ହୋଇଛି।
ବୁର୍ଲା ବ୍ଲଡ ବ୍ୟାଙ୍କ ଅଧିକାରୀ ଡାକ୍ତର ଚିତ୍ତ ରଞ୍ଜନ ପ୍ରସାଦ କହିଛନ୍ତି,“ସମ୍ପୃକ୍ତ ରୋଗୀଙ୍କ ଏଲିସା ରିପୋର୍ଟ ଆଜି ଆସିଛି। ଏଥିରେ ରିପୋର୍ଟ ନେଗେଟିଭ୍ ବାହାରିଛି। ତେଣୁ ସମ୍ପୃକ୍ତ ରୋଗୀ ଜଣକ ହେପାଟାଇଟିସ୍ରେ ଆକ୍ରାନ୍ତ ନୁହଁନ୍ତି ବୋଲି ସ୍ପଷ୍ଟ ହୋଇଛି। ଆଜିର ରିପୋର୍ଟ ଉପରେ ବିଶ୍ୱାସ କରାଯିବ କାହିଁକି ନା ଏହି ନମୂନା ଅନ୍ୟ ଏକ ବିଭାଗର ଭିନ୍ନ ମେସିନ୍ରେ କରାଯାଇଛି। ଏହା ଉପରେ ଆମେ ଆହୁରି ଗବେଷଣା ଜାରି ରଖିଛୁ।”
ଏପଟେ ଘଟଣା ପଦାକୁ ଆସିବାର ତିନି ଦିନ ପରେ ମଧ୍ୟ ଏଚ୍ଆଇଭି ସଂକ୍ରମିତ ବ୍ୟକ୍ତିଙ୍କ ରକ୍ତ ନମୂନା ଏପର୍ଯ୍ୟନ୍ତ ସଂଗ୍ରହ କରାଯାଇନାହିଁ। କାହିଁକି ଏହି ପରୀକ୍ଷାରେ ବିଳମ୍ବ ହେଉଛି ତାକୁ ନେଇ ସନ୍ଦେହ ସୃଷ୍ଟି ହୋଇଥିବା ବେଳେ ଗଣମାଧ୍ୟମ ଉପରେ ବର୍ଷିଛନ୍ତି ସମ୍ବଲପୁର ବିଧାୟିକା ଡା.ରାସେଶ୍ୱରୀ ପାଣୀଗ୍ରାହୀ।
ପାଣିଗ୍ରାହୀ କହିଛନ୍ତି,“ବୁର୍ଲା ବଡ ମେଡିକାଲରେ ରୋଗୀଙ୍କୁ ଏଚ୍ଆଇଭି ଓ ହେପାଟାଇଟିସ ସଂକ୍ରମିତ ରକ୍ତ ଦିଆଯିବା ନେଇ ଗଣମାଧ୍ୟମରେ ଯେଉଁ ଖବର ପ୍ରକାଶ କରାଗଲା ଏନେଇ ଆମେ ଜାଣିନାହୁଁ କି ସମ୍ପୃକ୍ତ ସଂସ୍ଥାର ମୁଖ୍ୟଙ୍କୁ ଅବଗତ କରାଯାଇନାହିଁ। ଏନେଇ ବୁର୍ଲା ମେଡିକାଲ କର୍ତ୍ତୃପକ୍ଷଙ୍କ ଆଗୋଚରରେ ଗଣମାଧ୍ୟମରେ ଏହାକୁ ବେଶୀ ପ୍ରାଧାନ୍ୟ ଦେଇ ପ୍ରସାରିତ କରାଗଲା। ଗଣମାଧ୍ୟମ ଏନେଇ ଚିନ୍ତା କରିବା ଉଚିତ ଥିଲା। ଏହିପରି ଏକ ସ୍ପର୍ଶକାତର ବିଷୟକୁ ଗଣମାଧ୍ୟମରେ ଜୋରସୋରରେ ପ୍ରଚାରିତ କରାଯିବା ଉଚିତ ହୋଇନାହିଁ।”