କମୁଛି ଇଞ୍ଜିନିୟରିଂ ପାଠ ପ୍ରତି ଆଦର; ୨୦୦ ଶିକ୍ଷାନୁଷ୍ଠାନରେ ବନ୍ଦ ହେବ ଇଞ୍ଜିନିୟରିଂ ପାଠ୍ୟକ୍ରମ

ଭୁବନେଶ୍ୱର(ଓଡ଼ିଶା ରିପୋର୍ଟର): ସଙ୍କଟରେ ବୈଷୟିକ ଶିକ୍ଷା। କେବଳ ଓଡ଼ିଶା ନୁହେଁ, ସାରା ଦେଶରେ ସମାନ ଅବସ୍ଥା ଦେଖା ଦେଇଛି। ଗଦାଗଦା ଇଞ୍ଜିନିୟରିଂ କଲେଜ, କିନ୍ତୁ ପିଲା ନାହାନ୍ତି। ବୈଷୟିକ ଶିକ୍ଷା ପ୍ରତି ଛାତ୍ରଛାତ୍ରୀଙ୍କ ଆଗ୍ରହ କମିବା ପଛରେ ନିଯୁକ୍ତି ସୁଯୋଗର ଅଭାବ ଏକ ପ୍ରମୁଖ କାରଣ ହୋଇଛି।

ଛତୁ ଫୁଟିଲା ପରି ଅସଂଖ୍ୟ ଇଞ୍ଜିନିୟରିଂ କଲେଜ ଖୋଲିଛି।ହେଲେ ସିଟ୍ ଖାଲି ପଡ଼ୁଛି। ସାରା ଦେଶରେ ଥିବା ଇଞ୍ଜିନିୟରିଂ କଲେଜରେ ୫୦ ପ୍ରତିଶତ ସିଟ୍ ଖାଲି ପଡୁଥିବା ବେଳେ, ଓଡ଼ିଶାରେ ୫ବର୍ଷ ହେବ ୬୦ ପ୍ରତିଶତ ସିଟ୍ ଖାଲି ପଡୁଛି। ତେଣୁ ଭଲ ପ୍ରଦର୍ଶନ କରୁ ନ ଥିବା କଲେଜ ଗୁଡ଼ିକରୁ ୮୦ ହଜାର ସିଟ୍ କମାଇବାକୁ ନିଷ୍ପତ୍ତି ନେଇଛି ସର୍ବଭାରତୀୟ ବୈଷୟିକ ଶିକ୍ଷା ପରିଷଦ( AICTE)। ପ୍ରାୟ ୨୦୦ ଶିକ୍ଷାନୁଷ୍ଠାନ ଇଞ୍ଜିନିୟରିଂ ପାଠ୍ୟକ୍ରମ ବନ୍ଦ କରିବାକୁ ଆବେଦନ କରିଛନ୍ତି। ଏଭଳି ପରିସ୍ଥିତି ପାଇଁ ଉଭୟ ଛାତ୍ରଛାତ୍ରୀ ଓ ଶିକ୍ଷାନୁଷ୍ଠାନକୁ ଦାୟୀ କରିଛନ୍ତି ଶିକ୍ଷାବିତ୍।

ପୁଅକୁ ଇଞ୍ଜିନିୟର୍ କରିବାକୁ ସ୍ୱପ୍ନ ଦେଖିଥିବା ଜଣେ ବାପା ପ୍ରଶାନ୍ତ କୁମାର ରାଉତରାୟ  କହିଛନ୍ତି,“ପୁଅ ଇଞ୍ଜିନିୟରିଂ ପଢ଼ିଲା। କିନ୍ତୁ ଡ୍ରାଇଭିଂ କରୁଛି। ସ୍ୱପ୍ନ ଆଉ ସତ ଭିତରେ ଏବେ ଆକାଶ ପାତାଳ ଫରକ୍।  ପୁଅ ପ୍ରଭୁଦତ୍ତ ଇଞ୍ଜିନିୟରିଂକୁ କ୍ୟାରିୟର୍ କରିବା ପାଇଁ ପ୍ରଥମେ ଡିପ୍ଲୋମା ଓ ପରେ ବିଟେକ୍ କଲା।  ପୁଅକୁ ଇଞ୍ଜିନିୟର୍ କରିବା ଆଶାରେ କଲେଜରେ ଲକ୍ଷଲକ୍ଷ ଟଙ୍କାର ଡୋନେସନ୍ ଦେଲି।ପୁଅ ପାଇଁ ପାଣି ପରି ପଇସା ଖର୍ଚ୍ଚ କଲି। କିନ୍ତୁ ସ୍ୱପ୍ନ ସ୍ୱପ୍ନରେ ରହିଗଲା। ଏବେ ପୁଅ ଚାକିରୀ ନ ପାଇ  କାର୍ ଡ୍ରାଇଭିଂ କରୁଛି।”