ଜୟପୁର: ପରୀକ୍ଷା ପାଇଁ ଗଲା ୮ ଘୁଷୁରୀର ରକ୍ତ ନମୁନା

ଜୟପୁର: ମାଲକାନଗିରିରେ ମହାମାରୀର ରୂପ ନେଇଥିବା ଜାପାନିଜ୍ ଏନ୍‌ସେଫାଲାଇଟିସ୍‌କୁ ନେଇ ଜୟପୁର ସହରରେ ସଚେତନତା କାର୍ଯ୍ୟକ୍ରମ ଆରମ୍ଭ ହୋଇଛି। ଆଜି ୮ଟି ଘୁଷୁରୀଙ୍କ ରକ୍ତ ନମୁନା ପ୍ରାଣୀ ଚିକିତ୍ସା ବିଭାଗ ସଂଗ୍ରହ କରିଛି। ମଶାରୀ ଟାଣି ଶୋଇବାକୁ ଲୋକଙ୍କୁ ପରାମର୍ଶ ଦିଆଯାଉଛି।

ଗତକାଲି ଏଠାରେ ଜଣେ ଶିଶୁଙ୍କ ମୃତ୍ୟୁ ହୋଇଛି। ଶିଶୁଟିର ମୃତ୍ୟୁ ଜାପାନିଜ୍‌ ଏନ୍‌ସେଫାଲାଇଟିସ୍‌ରେ ହୋଇଥିବା ଆଶଙ୍କା କରାଯାଉଛି।

ଏଡିଏମ୍‌ଓ ଅରୁଣ ପାଢ଼ୀ କହିଛନ୍ତି,“ଏନ୍‌ସେଫାଲାଇଟିସ୍‌କୁ ନେଇ ଲୋକେ ବ୍ୟସ୍ତ ହେବାର କିଛି କାରଣ ନାହିଁ। ଯଦି ଏନ୍‌ସେଫାଲାଇଟିସ୍‌ ଭୂତାଣୁ ବାହାରିବ କିମ୍ୱା ଭବିଷ୍ୟତରେ ଏହା ବ୍ୟାପିବାର ଆଶଙ୍କା ଥିବ ତାକୁ ଆଖି ଆଗରେ ରଖି ଆମେ ସଫାସୁତରାକୁ ଅଧିକ ଗୁରୁତ୍ୱ ଦେଉଛୁ। ବସ୍ତି ଅଞ୍ଚଳ ବା ଏହି ରୋଗ ବ୍ୟାପିବାର ଆଶଙ୍କା ଥିବା ସ୍ଥାନରେ ଡିଡିଟି ଛିଞ୍ଚନ କରାଯିବା ସହ ଫଗିଂ କରିବା ବ୍ୟବସ୍ଥା ମଧ୍ୟ କରାଯାଉଛି।”

ଉପଜିଲ୍ଲାପାଳ କୃତିବାସ ରାଉତ କହିଛନ୍ତି,“ ପ୍ରାଣୀ ଚିକିତ୍ସା ବିଭାଗ ଆଜି ଘୁଷୁରୀଙ୍କ ରକ୍ତ ନମୂନା ସଂଗ୍ରହ କରିଛନ୍ତି। ଏହି ନମୂନାକୁ ପରୀକ୍ଷା ପାଇଁ ପଠାଇବେ। ରିପୋର୍ଟ ଆସିବା ପରେ ଉଚିତ୍‌ ପଦକ୍ଷେପ ନିଆଯିବ।”