କାଳ ହେଲା ହାତୀ ସହ ସେଲଫି: ସମସ୍ତଙ୍କ ଆଗରେ ଶୁଣ୍ଢରେ କଚାଡ଼ି ମାରିଦେଲା

<p>ରାଉରକେଲା (ଓଡ଼ିଶା ରିପୋର୍ଟର): ସେଲ୍&zwnj;ଫି ହେଲା କାଳ। ହାତୀ ସହିତ ସେଲଫି ନେଉଥିବା ବେଳେ ଆଜି ଜଣେ ଯୁବକର ଜୀବନ ଯାଇଛି। ହାତୀଟି ଯୁବକଙ୍କୁ ଶୁଣ୍ଢରେ କଚାଡ଼ି ମାଡ଼ି ଦେଇଛି। ଏପରି ଅଭାବନୀୟ ଘଟଣା ରାଉରକେଲା ନିର୍ବାଚନମଣ୍ଡଳୀ ଅନ୍ତର୍ଗତ ମାଣ୍ଡିଆକୁଦ ଗାଁରେ ଘଟିଛି। ଗାଁକୁ ପଶି ଆସିଥିବା ଏକ ହାତୀକୁ ବନ ବିଭାଗ କର୍ମଚାରୀ ଓ ସ୍ଥାନୀୟ ଲୋକେ ଘଉଡାଇବା ବେଳେ ଏପରି ଅଘଟଣ ଘଟିଛି।</p> <p>ଗତକାଲି ରାତିରେ ନିକଟସ୍ଥ ଜଙ୍ଗଲରୁ ଏକ ହାତୀପଲ ଖାଦ୍ୟ ଅନ୍ୱେଷଣରେ ଗ୍ରାମାଭିମୁଖୀ ହୋଇଥିଲେ। ହେଲେ ସେଥିରୁ ଗୋଟିଏ ହାତୀ ଗୋଠ ହୁଡି ମାଣ୍ଡିଆକୁଦ ଗାଁରେ ପଶି ଯାଇଥିଲା। ଆଜି ସକାଳେ ଗାଁ ଲୋକେ ହାତୀ ଦେଖି ବନ ବିଭାଗ କର୍ମଚାରୀଙ୍କୁ ଖବର ଦେଇଥିଲେ। ବନ ବିଭାଗ କର୍ମଚାରୀମାନେ ଗାଁ ଲୋକଙ୍କ ସହାୟତାରେ ହାତୀଟିକୁ ଘଉଡାଇ ଥିଲେ। ଏହି ସମୟରେ ଅଶୋକ ଭାରତୀ ନାମକ ଜଣେ ଯୁବକ ହାତୀର ନିକଟକୁ ଯାଇ ସେଲ୍&zwnj;ଫି ନେଉ ଥିଲେ। ହାତୀଟି ତାଙ୍କୁ ଶୁଣ୍ଢରେ ଟାଣି ନେଇ କଚାଡ଼ି ଦେଇଥିଲା। ଘଟଣା ସ୍ଥଳରେ ତାଙ୍କର ମୁତ୍ୟୁ ହୋଇଥିଲା। ଏହାକୁ ନେଇ ଗାଁରେ ଉତ୍ତେଜନା ପ୍ରକାଶ ପାଇଛି। ଏଥିପାଇଁ ବନ ବିଭାଗକୁ ଦାୟୀ କରିଛନ୍ତି ଗାଁ ଲୋକେ।</p> <p>ଆଜିର ଯୁବପିଢ଼ିଙ୍କୁ ସେଲ୍&zwnj;ଫି ମାନିଆ ଘାରିଛି। ଯୁବକ ଓ ଯୁବତୀମାନେ ବିପଦପୂର୍ଣ୍ଣ ଅବସ୍ଥାରେ ସେଲ୍&zwnj;ଫି ନେଉଛନ୍ତି। ଏପରି ସେଲ୍&zwnj;ଫି ଅନେକ ଜୀବନ ମଧ୍ୟ ନେଇଛି। ତଥାପି ଯୁବପିଢ଼ି ଏଥିରୁ କିଛି ଶିଖି ପାରୁନି। ଜାଣିଶୁଣି ମୃତ୍ୟୁ ପଛରେ ଦୌଡ଼ୁଛି। କେତେବେଳେ ଖମ୍ୱ ଉପରେ ଠିଆ ହୋଇ ସେଲ୍&zwnj;ଫି ନେଉଛନ୍ତି ତ ଆଉ କେତେବେଳେ ହାତୀ ନିକଟରେ ସେଲ୍&zwnj;ଫି ନେଇ ବିପଦରେ ପଡ଼ୁଛନ୍ତି।</p>